騙徒手法層出不窮，估唔到今次中招的苦主，竟然是平日眉精眼企的－－張敬軒！
軒仔今日在社交網晒手提電話盒裝相片，以為收到粉絲大手筆送手機，點知原來被大整蠱，軒仔繪形繪聲細述「案」件詳情：「呢單嘢直情要上警訊我話你知，話說我喺屋企清理上次簽名會fans送嘅禮物，跟住見到有部大iPhone，心入邊內疚咗好耐：（#鄧碧雲媽打腔）我啲歌迷成日都咁破費，搵個錢唔容易，真係有我心 #粒眼淚真係爭啲就跌出嚟 #跟着心諗（轉 #李司棋真情阿家腔#司棋姐親自留言更正 #應該係善姨腔）既然人哋一番好意就唔好拒絕啦，啲電器擺得耐都會壞㗎！」
點知軒仔打開個盒，當堂晴天霹靂：「我變咗隻澳洲樹熊 #唔_係啩 #金莎嚟嘅趙李 #下邊佢仲要加塊鐵板扮重 #仲要exac7ly啱size #我當堂轉周星馳tone #吖好嘢好嘢 #我話你知我班fans真係食腦㗎 #正所謂有仇不報非君子 #你哋班嘢你ting住下次買碟收隻光酥餅喇你哋 #對上呢句記得用黃韻詩tone #亞叔你哋都呃真係好冇陰功」！
一班藝人好友齊齊剝花生，蔡卓妍留言：「人哋花咁多心思嚟呃你 都呃得抵啦」，何韻詩直情笑軒仔做懵炳：「無咗封膠你都收，正懵炳。」軒仔反駁：「佢係封咗膠紙原裝一樣㗎我頂佢，仲要唔知幾時擺落堆禮物度，我直情冇印象我有接過手！」網民都取笑埋一份：「有點嘅偶像就有點嘅fans」。
(apple daily)
