九十年代憑清純可愛形象風靡萬千少男的劉小慧，自下嫁草蜢成員蘇志威後便退出娛樂圈，專心相夫教子，並育有兩名愛女，家庭幸福。
日前她突然於社交網預告今日下午開Facebook Live，分享生活經驗，又會教網民去特別的食肆食好西，又大賣關子自揭另一外號「得閒修女」的由來，引來大批Fans留言嗌期待！
小慧接受東網訪問時透露，「復出」希望顛覆大家對她的形象︰「我人生完全冇Schedule，話退出就退出，突然想出嚟見人就開Live，以前唱歌畀『玉女』框死咗，其實我係『烈女』，好鍾意同人分享，小至家居用品、大至點樣去拎到個代理，中醫都得，三九唔識七都可以吹一大餐，我直情係『吹神』﹗」
退出娛圈廿多年，一家四口生活美滿，她大讚老公蘇志威超過一百分︰「呢個老公冇得頂！畀好大自由度我之外，我做每一件事都好支持。（怕唔怕老公被花花世界蒙蔽而出軌？） 以前會諗都係無鬼聊，我對自己有信心，有時知佢去應酬打畀佢都係驚佢醉啫，擔心多過懷疑。就算有女公關一齊坐低，我都冇擔心過，同埋依家啲狗仔隊咁勁，咁多人幫我Mon住，你都夠薑做，好嘢！」小慧更「烈女」上身：「如果有一日段婚姻係我要容忍嘅話， Sorry，我一定會斬斷囉！」
至於一對愛女，小慧會讓她們自由發展，大女蘇君蕎正留日拜師學藝做甜品，而細女蘇靖珺則迷上韓星BTS，上網學跳舞，回家跟擅長跳舞的爹哋研究舞步：「個女會講唔係咁樣跳，個用力點唔喺呢隻腳度，仲話爹哋都跳唔到韓星嗰啲舞，個人要夠輕身。」認真爆笑！ 惟歡笑背後，細女曾經歷讀名校壓力大到頭痛，令小慧心痛：「之前佢讀書有啲吃力，係我強加咗畀佢，一去補習就話頭痛，有次仲喊晒話前額好痛，就知呢個係警號，即刻同佢轉校，依家佢嘅學習態度輕鬆好多，一提起學校就眉飛色舞。」
細談「烈女」進化史，小慧自嘲性格貪玩，1996年成功考牌做「鐵騎士」揸重型戰車，礙於當年要捍衞「玉女」形象，只好一直戴面具做人，不過「烈女」好容易原形畢露︰「以前着燈着得好快，記得有次喺尖沙咀，有個職業司機話我攔住佢泊車，一嚟佢唔禮貌，我又用啲唔係幾好嘅語氣去回應，令件事惡化。（點收科？）冇收科，我咪叫警察嚟囉！但其實如果當時講句唔好意思，件事就唔會發生。」
(on.cc)
