藝人袁偉豪（Ben）現身電台接受鄭裕玲訪問，表示會分享無綫熱播劇《鐵探》的拍攝趣事。問到可有被鄭裕玲要求爆料？他笑笑口話：「都有。（例如你畀人跣？）自己跣自己就成日有，拍《鐵》要喺鬧市街頭飛奔咁跑，都真係跣低過，覺得唔開心，唔係演得最暢快、最全力，過程中要承受啲問題係會影響演出。」
講到劇集中最大挑戰是勁減20磅，成功做到好瘦、好憔悴的感覺，Ben說：「諗起都好艱辛，最瘦嘅時候同中學時期一樣140磅，之後都未跌穿過呢個數字。」
不過Ben竟然「回味」當時身形，兼自嘲好變態：「到煞科嗰日我照鏡，見到自己真係進入到水準位，眼凸之餘，塊面瘦到啲牙都開始哨出嚟咁，睇到覺得好興奮！呢個就係想要嘅效果，但無奈已經煞咗科，如果有多3個星期準備，視覺效果會更加震撼！」
問到女友張寶兒（Bowie）見瘦到皮包骨的他，可有心痛？Ben指女友唔驚，全程都睇住自己，又透露曾試過着住焗汗衫去清水灣跑步，跑到半路驚見白影覺暈：「即刻打畀Bowie同佢講頂唔順，話要行返嚟，叫佢整定啲番薯急救。（點解要咁辛苦？）係我對工作有個心結，希望可以嘗試多方面嘅發展，下次想增肥，增肥樂趣大啲、方法又多啲！」
(on.cc)
