藝人張衞健（Dicky）舉行分享會。
他在台上自爆曾結過三次婚，即令全場嘩然…
期後他急忙補鑊說：「係同一個新娘！」講到第一次結婚，是十幾年前同太太張茜偷偷哋去南京註冊，當時自覺是偶像派，不可以對Fans洩密。
Dicky同時又覺得身為天主教徒，應該要有個天主教儀式的婚禮，剛巧張茜當期時為菲律賓旅遊局合作，就被邀請到當地、被列入世界文化遺產的聖奧古斯丁教堂舉行第二次婚禮，原以為一切進行順利之際，結局卻出人意表。
「太太唔係天主教徒，應該要去上婚前輔導課程先，但個Wedding Planner話冇問題，但喺出發前5日先話唔得，我都請晒親朋好友，冇得話取消再約，最後佢哋話係當特別個案處理，借間教堂畀我哋，不過唔提供神父！咁點呀？之後唔知邊個安排一個唔係神父嘅神父，演戲咁演、做戲咁做，都真係暈低！」之後第三次就於香港玫瑰堂舉行多次婚禮：「因為菲律賓嗰次經歷，香港擺就得5個人。」更不禁自嘲憑堅持才結到三次婚。
繼而講到求婚過程，Dicky指有意無意間知道，當時太太願望是可以30歲前結婚：「嗰時佢都29歲半，覺得大限到，就決定求婚，但畀人我話冇花冇戒指，仲話我着住條穿窿褲求婚，所以就候補戒指。」
他為求讓太太有個難忘的求婚，諗爆頭最後決定於維多利亞海中央：「12年前搭天星小輪5蚊有找！諗住喺Magic Hour、有夕陽嘅時候求婚，但人算不如天算，冇計到人哋收工，架小輪爆晒人！喺就到嘅時候都求唔到，隻戒指就袋喺褲袋入面，捉住太太隻手入褲袋摷隻戒指，喺入面再套落佢隻手指度，記得當時畀坐對面個印藉人士見到晒呢個動作，但都係一個Sweet Memory！」續指能完成到太太30歲前結婚的願望都好引以為傲。
當主持問到信仰如何幫助二人婚姻？Dicky坦言信任最重要，又大爆曾被太太Check Record，不過都冇有怕：「我冇衰過，個底冇花好乾淨！同埋佢知儘管我想搞搞陣，都會即刻意識到唔可以犯十戒。」
(綜合報道 / on.cc)
