台灣歌手田馥甄（Hebe）今日（30日）係佢36歲生日，咁貫徹藝人分享症嘅作風，佢都喺社交網上載咗慶祝生日嘅相，相中見佢Blur咗自己個樣，不過都依然睇得出佢非常開心，笑晒口又揈晒頭髮咁，不過亦睇到佢托腮托頭狀甚苦惱，隱約透出一絲嘅尷尬同無奈……原來…Hebe係患咗「不治之症」！
佢嘅助手就喺佢Facebook上留言，指Hebe患嘅係「慶生尷尬症」，仲「嚴重」到會崩潰、休克、汗流浹背等等，更加令人頭痛嘅係連Hebe雙親都幫唔到佢走出「困境」：「某田姓女歌手，因在沒任何防備下提早被慶生，一時手足無措，導致該名女歌手差點崩潰、休克、汗流浹背、找不到升降台降下，據友人透露該名女歌手天生罹患慶生尷尬症，至今仍未治癒，他的雙親不斷替她找尋各種偏方，依然未見改善。本樂手持續追蹤報道，且祝田姓女歌手早日康復。」
加上助手Tag住「#第一排搖滾區但拍不到高清照」、「#尷尬症的藥跟高清圖一樣難求」，幽默嘅文筆真係氹到網友笑到Gap gap聲，睇嚟Hebe要快啲「康復」喇，話晒年年生日都係主角，第時睇番啲相幾尷尬呢……
(on.cc)
