歌手古巨基（基仔）在昨晚（28日）播出最後一集「亂世兄弟古巨基 x 森美旅行團」中，基仔單拖上陣，訪問一位在日本居住的港男Andy，覓得日本未婚妻恭子的故事，訪問中，基仔同Andy和恭子作一次中日文化大交流、並探討異國聯婚等話題。
提到文化差異，語言會否係最大的障礙時，基仔好奇問如果嗌交時大家會點？Andy話：「鬧交嘅時候好好笑㗎，鬧鬧吓講唔到，跟住拎個電話出嚟翻譯，再指畀佢睇：『呢個呀！』跟住就唔嬲，鬧唔到㗎喇！」基仔表示嗌交其實是爆發那一刻情緒，仲話：「我喺屋企都試吓同老婆咁樣嗌交先得，有咩閙寫出嚟。」
Andy求婚成功，基仔就準備咗一套中式裙褂送給恭子，之後齊齊到東京鐵塔影裙褂照，基仔除了做客席攝影師，指導兩人表情同pose外，還化身人肉腳架，用手托住經典日劇《戀愛世紀》（Love Generation）中的水晶影相，十分落力。
基仔笑言忍唔住要同古太講：「喂！古太，我哋都影吖。」最後基仔用電話同古太在東京鐵塔前selfie，大放閃光彈。基仔自認是個浪漫的人，鍾意諗小心思去留低回憶，將來可以回味。
他說由認識古太開始，已經知道她是一個不喜歡影相的人，他說：「佢天生好唔鍾意影相，但近年喺我嘅薰陶同夾硬嚟之下，佢同我影好多selfie、合照去留念。我同佢講，將來老咗七、八十歲，有啲相揸喺手先至係可以好多回味，如果得三幾張冇嘢睇，所以依家要影多啲相呀。」
(on.cc)
