藝人鄭中基（Ronald）出席香港大學的分享會，由於其《美女廚房》主持的形象深入民心，所以大會更安排了三間學生飯堂的食物讓他試食。
講到日前陳奕迅（Eason）到公開大學分享，但有學生因掛住玩手機而激怒他。
問Ronald若遇到同樣情況會如何處理？他笑言：「我咪玩埋一份，我叫助手畀部手機我一齊玩，冇乜嘢呀！（Eason叫玩手機學生離場。）叫人出去又唔好，咁萬一人哋真係有乜急事呢？我咪叫佢攞部手機嚟睇吓，有開心事大家share。（會唔會覺得學生玩手機係唔尊重？）依家呢個年代，我唔會覺得，我唔信佢（Eason）開會唔會loop個手機，你自己都會啦，人哋都唔會叫你出去。但如果喺十幾年前，攞部牛龜咁大嘅電話出嚟講，咁就係好唔尊重同搞事，但依家唔會，我覺得ok，冇問題。而且今日都冇人咁做，可能因為天氣熱，再講電話，部手機就爆。」
Ronald表示今次的主題是幽默感：「講吓有幽默感會唔會方便啲追女仔？做嘢又會唔會好啲。同埋幽默感係天生定可以學。（你係因為幽默感而追到太太余思敏？）唔係。（因為靚仔？）一定係靚仔，冇其他原因。（覺得自己係咪有幽默感嘅人？）佢哋覺得我好笑，但我唔係特別去學，係天生。其實好笑有兩種，一係適當時候講啲嘢令人覺得好笑，一係講爛gag，都可以好受歡迎，只係想大家開心。（要正面？）要正面，有啲人覺得好笑，但係講啲賤嘢，人生攻擊，咁就唔得。」
另外，講到工作方面，Ronald透露剛拍完電影《遺愛》，五月便開始巡迴演唱會，九月就拍攝《龍咁威3》。之前太太指正努力鑽研廚藝，因被老公投訴，Ronald澄清：「我唔係投訴，但佢積極咗好多，真係好好食，尤其薑葱蠔同三杯雞，佢想谷肥我，因為《龍咁威3》要增肥十幾磅，講我去同志邪骨店放蛇。」
(on.cc)
