無綫劇集《福爾摩師奶》自開播以來口碑不錯，今晚將會播出大結局，唔少人都好想知道究竟邊個係開膛手。
而喺入面飾演「有力嫂」嘅黃穎君（Burmie）表示好開心可以參演呢套劇，仲嘗試人生首次吊威吔，笑言比想像中容易接受。
講到全城都好想知道開膛手身份，Burmie笑言被親朋好友「逼供」，連對住阿媽都封口唔講！
「主演嘅演員都封口唔講，所以我冇理由咁衰女，連阿媽問我都冇講，叫佢哋睇到尾，但我畀咗個貼士佢哋，其實開膛手並唔係得一個。」
另外，Burmie指成班演員感情好好，似足大家庭：「因為都開咗工幾個月，大家差唔多日日見，無論宣傳同慶功，所有嘅活動大家都盡量抽時間出席，有一個大家庭嘅感覺，我都好嚮往呢啲演員生活。」
(on.cc)
