藝人單立文（豹哥）與老婆胡蓓蔚（豹嫂）一向係圈中嘅模範夫妻，不時大晒恩愛閃盲網民。
尋日係兩人結婚11周年，豹嫂喺社交網透露兩公婆因為音樂而相識：「很多人一直問我們：『你們是怎麼見面的？』好吧，聽起來很正常，音樂將我們聚集在一起！當我們在1996年錄製我的第一張粵語專輯時，他就是我的製作人，我只是一個想在香港創作的歌手。我想我們都做得很好。現在看看我們，我對我們的未來充滿信心，但為甚麼他看起來有點困惑？11周年快樂老公❤我知道你可以做得更好！」
好多網民都催佢哋快啲生番個豹仔豹女，就連好友袁偉豪同陳山聰乘機抽水，一個叫生仔，一個叫生女，十分搞笑！
不過明明係胡蓓蔚（豹嫂）同單立文（豹哥）結婚11周年嘅浪漫約會，最後竟然成為6個人的約會……
有份做「電燈膽」嘅李施嬅，佢就喺社交網上載合照，仲話其實佢哋係知豹哥豹嫂係想慶祝11周年，不過因為佢自己即將出戰加拿大奧斯卡，所以就嗌埋胡說八道會成員黃智雯、胡定欣同番外成員趙希洛一齊食飯餞行，六人行更熱鬧！
「本來是豹哥豹嫂兩個人浪漫慶祝11周年紀念，但知道我要飛，想一起食飯，同我餞行，加下加下變咗六個人食飯。好感動，好窩心。#胡說八道會 #我提名人哋比我更開心 #就是愛」
胡說八道會呢個公開組織團結程度一向都喺圈中數一數二，雖然成員結婚、生仔、開劇，連提名「加拿大奧斯卡」都做齊，真係各有各忙，不過佢哋都總會為聚首而抽時間！
雖然浪漫約會被騎劫，不過都睇得出豹哥豹嫂都唔介意，成班人係咁Selfie，6個人過又點話啫～～
(綜合報道/on.cc)
