處境劇《愛．回家之開心速遞》仍然係無綫中收視保持最高企嘅劇集，不論後生、老人家都咁啱睇，輕輕鬆鬆又一晚！
昨晚播出嘅一集，輪到一班甘草演員發威，75歲「熊樹根」劉丹、70歲「龍敢威」羅樂林、63歲「譚道德」陳榮峻，一個老香港、一個億萬富翁、一個小學校長，因為唔想畀啲後生睇死，齊齊聽個師奶講，去參加電視台Hip Hop比賽。
最好笑個師奶病咗甩底，要搵「豹哥」，唔係單立文，而係68歲嘅「馬豹」黎彼得戥腳，組成「大四喜」參賽！
正當眾人以為佢哋會出醜人前之際，無啦啦又畀佢哋過骨，仲係Rap到Very骨（Good）。
佢哋四個一副Hip Hop裝束上陣、戴晒Cap帽同金鏈，已經好鬼吸引，Rap起上嚟又幾好聽，加埋啲歌詞又抵死！
「Hey乜嘢叫做IG我哋唔知 我哋淨係知 企上台我哋可以」、「我哋有吉士 幾多歲都好都未會怕瘀」，網民都大讚四個果然係無綫實力派演員呀！
雖然加埋都270幾歲，但演乜似乜，仲鬼咁有精力又精靈，難怪觀眾咁鍾意睇《愛．回家》啦！
超型！
(綜合報道/on.cc)
