吳日言（Yan）去年11月為老公Barry誕下愛女Beatrice，日前以「123日派對」做主題為囡囡舉行百日宴。
跟Yan同年出道的董敏莉、「生煎包王子」蕭潤邦（Oscar）、林芊妤（Coffee）、前DJ梁梓禧和鍾慧冰等都有到賀，董敏莉和Coffee更帶了她們的BB到來，變成BB們gathering。
Yan昨晚把囡囡打扮成可愛小公主，小小的Beatrice未知是否不習慣有太多陌生親友，她面對鏡頭時一度扁扁嘴。梁梓禧昨晚把照片放上facebook與大家分享，大合照當中，Yan一家三口卻企旁邊，反而梁梓禧和鍾慧冰「攝」正中間，難怪梁梓禧得戚留言：「唔好意思，幅相似我同冰姐（鍾慧冰）搞百日宴咁㖭。」
梁梓禧看到好友董敏莉和Yan都升呢人母，他又說：「呢兩位女士分別都做人阿媽，我表示驚訝，人生。尤其董敏莉，我唔敢相信佢識湊B。」
Oscar昨晚貼相後也留言祝賀Yan夫婦：「喺好耐好耐以前睇住你哋大，睇住你哋拍拖，睇住你哋結婚，睇住你哋生BB，123日繼續身體健康精靈可愛，大家繼續努力。」
昨日Yan接受《蘋果》電話訪問，她說：「轉眼Beatrice已經123日，我特登揀呢個日子，邀請咗過百位賓客同囡囡慶祝，Coffee同monie都有帶埋寶貝一齊嚟，3個新手媽咪合照都雞手鴨腳，好搞笑。」
Yan又讚囡囡在百日宴表現淡定，大家都讚她見慣大場面，長大後可以做幕前。Yan說：「其實而家都有嬰兒產品搵囡囡試用同分享，我都有意打造佢成為新一代BB KOL，賺下書簿費，而家佢自己搵嘅錢同利是錢，我都有幫佢儲起，已經有六位數字，希望從小培養佢儲蓄同投資嘅習慣，目標係18歲嘅時候可以有七位數字。」
