藝人鄭嘉穎太太陳凱琳上月誕下「小嘉穎」鄭承悅，升呢做新手爸爸媽媽嘅佢哋就梗係又開心又興奮啦！
早前嘉穎接受訪問大談初為人父的苦與樂，並以「皇上」來稱呼兒子！
「佢啱啱出世一個月，現階段屋企好需要我，淨得太太真係搞唔掂，嗰個『皇上』好扭計，服待佢要快，慢就喊到七彩！我終於明白點解啲人話女人有產後抑鬱，我都想抑鬱，真係搞到人都癲，好難搞，拍戲簡單一百倍。（會不會再生？）你畀我過完呢關先，我都要定一定驚，依家出嚟都會擔心同心掛掛，我整個人生、心態同思維都唔同晒，小朋友排喺第一位，自己放到好後。」
要「定驚」的他拍戲反而不擔心受傷：「冇得驚，上得台唔可以怯，怯親就輸。（唔想離港工作？）呢個階段係，如果三個月唔喺香港真係唔得，多多錢都賺唔到。」人生階段有所改變，工作模式亦隨之轉變：「依家工作上會有選擇性，唔會好似以前咁多，以前唔可以揀，因為要搵食、要生計。」
嘉穎有份演出的電影《P風暴》，延續他在風暴系列的角色，飾演廉署調查主任，戲中有不少考體能的場口，除了在直升機上與林峯對打，還經常為保護證人而逃跑，而最難忘是要跑勻整個大球場，跑足全日：「由大球場外圍、辦公室、通道都跑過，未試過跑咁耐，真係跑馬拉松咁。」
談到首次與林峯合作拍打戲，嘉穎坦言是個不錯回憶：「大家嘅身手仲喺度。（咁耐冇合作，仲有冇默契？）向來佢做佢，我做我，所以個默契冇改變。」
(綜合報道/on.cc)
