藝人沈卓盈（Jess）離巢後與拍拖3年的圈外男友Calvin上月於泰國布吉秘婚。
「其實想留番白色情人節報喜，但係點知……不過唔緊要，都係開心事，總之成個wedding都喺布吉進行，結婚想低調進行，冇諗過大搞，宴請只係家人、兄弟姊妹，姊妹都係識於微時，包括六位，何傲兒、徐淑敏、陳自瑤、何傲芝、黃芳雯同髮型師好友。」
有索爆姊妹團！
其中Jess的好姊妹黃芳雯（Paula）專程飛抵布吉擔任陪嫁團，分享好姊妹的新婚喜悅。
今日，Paula於社交網站晒出與一對新人的合照，仲留言祝福：「好姊妹結婚了 這位認識十多年的老友，沿途和你同喜同悲。能夠見證你覓得人生中真愛，找到真誠愛您，守護您的好好先生，實在替你相當高興😊這是我參加過最浪漫的婚禮。最重要的家人和好朋友在一起，就是對新人最大的祝福！婚姻是人生漫長的一課，要好好享受和加油啊 杜太❤️❤️❤️」
Paula接受東網訪問開心謂有幸能參加好姊妹婚禮：「佢只係請咗最熟嘅親友，婚禮場地喺海邊好靚，又放晒煙花同天燈，就算係嚟參加婚禮嘅賓客都好投入，真係睇到佢先生係好錫佢，成個Trip都好照顧埋我哋。」她表示好衷心祝福好姊妹，大讚Jess是一位善良、識得照顧家人的好女仔，好值得找到一個愛錫她的老公：「希望佢開開心心，而生小朋友方面，都好似佢咁講，轉咗新嘅工作環境，生小朋友就隨緣，不過如果有埋小朋友就仲開心，屋企都會多好多歡笑聲，亦都知佢好鍾意小朋友，希望盡快聽到佢好消息，再參加百日宴！」
講到玩新郎環節，Paula大爆Jess「落令」要保護先生：「呢Part係我負責，佢同我講諗啲遊戲係要顧住先生個靚仔樣，唔想佢出汗、辛苦、肚屙，因為驚我唔知畀咩佢食，都有笑佢咁快就錫住晒冇嘢玩，最後啲蟲蟲茶其實都只係鹹竹蜂，畀佢先生開聲講愛的宣言，講都講得大聲啲！」
(綜合報道/on.cc)
