【陳國邦被發現…】羅敏莊:醫生血淋淋走出嚟同我講…

     

    剛過51歲生日的陳國邦,上月在港台劇集《現身說法》的拍攝現場,還透露自己飾演律師。當時見到他精神爽利,但原來其身體健康已響起警號!陳國邦的妻子羅敏莊,昨晚在facebook貼相,相中的陳國邦穿着醫院病人服,高舉兩隻手指晒V字,更口含牙籤、表情得戚,羅敏莊留言說:「維修成功!飲杯!」

    羅敏莊今日在港台節目《Made in Hong Kong》透露老公昨入院通波仔:「佢年紀大機器壞維修一吓,而家返咗屋企休息緊。」拍檔李志剛問是甚麼病?羅敏莊說:「佢心臟有啲問題要通波仔,其實好多上咗年紀嘅朋友都要,我喺fb擺咗一張令人安心嘅相。」

    羅敏莊踢爆老公曾不想做通波仔手術:「我想講,如果有親人知道身體有問題,但佢唔想去做嗰樣嘢,咁你會點樣?佢知道咗,但話:『唔使啦,食吓藥就得,食中藥、跑吓步,食清淡啲,自己通番。』即係佢當心臟血管係一條渠,可以通得到。但你身為親人會點做,咁我就衰啲,採取利用群眾壓力方法,不斷話畀人知,佢塞咗唔去通,朋友就會畀壓力佢,因為通常啲人都係聽朋友講,我用呢個方法,迫佢昨日入廠維修,佢話如果我唔係不斷用外界力量迫佢,佢唔會去。」

    李志剛取笑陳國邦身在福中不知福,羅敏莊笑說:「佢覺得我好煩,噚日醫生問做乜唔一早去,點解咁驚?其實而家手術好先進好簡單,唔使麻醉,喺手插導管就搞掂咗,中途叫家人入去解釋點做,我仲聽到老公同醫生好大聲講笑,成個過程佢係清醒,而醫生血淋淋走出嚟同我講嘢,我唔敢望佢隻手,只係望佢塊面,我驚我會暈。老公通通吓問我呢樣嗰樣,佢好放鬆,瞓着咗覺。」最後羅敏莊叮囑大家:「有病嘅時候真係要面對,唔好逃避。」

    而有傳媒聯絡過陳國邦,問他為何通波仔,他說:「我唔係有乜嘢唔舒服先至入去通波仔,我係檢查身體時,發現原來有條血管塞咗,所以去通波仔。我琴日朝8點幾入醫院,10點幾做手術,中午12點幾已經搞掂,同埋我唔係全身麻醉,係半身麻醉,所以好快清醒番,今日出院,聽日都返浸會教書。感覺幾好,我同老婆都唔擔心,好在早發現。」

     

     

     

     

     

    (appledaily)

    SHARE