今日係歌手謝安琪（Kay）42歲牛一，但佢尋晚就經歷咗前所未有咁徬徨嘅時刻！佢以風雲大使身份，現身首屆《KKBOX香港風雲榜頒獎典禮》，當唱出《羅生門》時，就不停示意咪及耳機出現問題，Kay惟有頂硬上演出，索性除掉耳機唱歌，自己數拍子，用專業搭救，最終演出順利，而台下觀眾都冇看出有任何異樣。
但Kay一落台就即刻爆喊，自己靠讀唇睇對手讀拍子，耳機只係得沙沙聲，而佢呢一喊連老公張繼聰（阿聰）都感到無比痛心！(相關新聞：https://goo.gl/8jMUJE)
阿聰於社交網發長文力撐老婆已經做到最好，句句真摰，非常感動！雖然耳機失靈，但Kay有老公錫番，相信好快收拾心情喇！
「知道你為咗依個演出，花咗無數嘅心血去練習再練習，希望做到最好。可惜Live performance 永遠有無限嘅意外會發生，而今次發生嘅意外，係歌手最恐懼嘅一種…耳機失靈Sub stage 冇台mon ,整個表演聽唔到自己把聲，聽唔到音樂聲…只係聽到耳機嘅沙沙聲，同觀眾席音響彈番嚟嘅聲（會展咁大，我估回音會唔止一浸），現場有幾千名觀眾，唔喺現場嘅更有數唔到咁多嘅觀眾….
依種情境，任何表演者發夢遇到都保証會嚇醒，不過，可惜，今次單嘢係堅嘅。依二十分鐘嘅痛苦，恐懼，㥬惶，心血白費…對表演者嚟講，係災難。」
「災難係堅嘅，不過我認為你更堅，咁嘅環境，你仍然奮力完成整個演出，冇放棄任何一粒音任何一個小節，The Show Must Go On ，係一個表演者嘅專業。個騷你唔止go on ,仲充滿勇氣咁完成，同埋，如果唔係經過咁充足嘅練習，一定冇可能做到，一定冇可能。大佬，聽唔到聲照唱，部琴冇聲照彈，聽唔到音樂數唔到拍子照入歌喎，真係靠心中有劍。」
「長篇大論，唔係因為我地嘅關係(夫妻關係)，而係大家都係表演者，所以好明白你經歷咗咩。意外冇人想嘅，不過你好叻，有d叻係要係危困當中先會展現出嚟。同埋今次之後，可以更加膽生毛啦，上到台冇嘢驚㗎啦！」
阿聰更叫Kay將呢個經歷當上天送畀佢嘅禮物，為老婆建立正面人生觀：「經歷係用嚟強化自己嘅 。312，個宇宙預早送依份禮物俾你，等你再Level Up ，算係咁啦！最後最後Happy Birthday My Lady 313。」
老公以長文安慰，字裏行間充滿愛，更鼓勵Kay要繼續堅强，相信Kay一定會重新站起來。
(ig / 綜合報道)
