【女星被爆去名店攞唔成折即場發爛渣】森美:佢係拍劇嘅

    DJ森美、小儀主持的電台節目《早霸王》,昨日有個女聽眾打電話爆料,聲稱一位不是「這一代」的女藝人到其任職的名店購物,因為攞唔到折扣而即場發爛渣,搞到場面好尷尬。

    聽眾指當日該女藝人頭戴cap帽、太陽眼鏡,確實冇乜人認得佢,而年輕嘅職員更加唔認識佢,當時佢買咗一件大約二千幾元嘅嘢,畀錢時佢話一向買開嘢都有折扣,個售貨員有禮貌問番佢個電話號碼或其他資料,方便查閱佢嘅account,因為呢個係公司規定要核客人身份,點知對方好大反應,當場發難:「要我攞身份證?我唔會囉!」更表示自己去第二間分店,職員一見到佢都會畀折,佢嬲到話:「叫你哋經理出嚟啦!」最搞笑陪同該女藝人嘅女人仲開口話:「你連佢係邊個都唔知?」因為真係冇人認得出佢,所以在場人士畀唔到反應,非常爆笑!

    最終爆料聽眾知道該女星係邊個,但就冇喺節目「開名」,只透露對方算係「紅過吓」。當時森美同小儀都笑言想八卦吓女星身份。

    森美回覆傳媒:「佢係拍劇,依家喺香港好少拍㗎啦,係90年代尾TVB嘅,都紅紅哋,我梗係唔會講出嚟,咁你唔認得佢,問佢攞資料梗係嬲。(你估唔估到?)都唔係好估到,唔知邊個,90年代咁多個,佢二千年代已經冇拍㗎啦。」

     

     

     

     

     

     

     

     

     

     

    (on.cc)

    SHARE