【被指女尊男卑成導火綫】呂慧儀黃文迪離婚一早有迹可尋

港姐港男出身嘅呂慧儀及黃文迪（Dickson）今日凌晨突然宣布分訊，令不少人感惋惜！呂慧儀2006年參選港姐獲得季軍，Dickson就喺2008年參選港男入行，不過兩人喺做Model時已經相識。

呂慧儀最後奪得季軍

喺2011年11月24日，呂慧儀突然喺社交平台宣布：「我要結婚了！」加上一張只背影婚照，原來新郎係拍拖10年嘅Dickson！到2014年，兩人更榮升父母！

雖然外型襯到絕，但喺事業發展上就大不同，呂慧儀有唔少拍劇機會，憑《原來愛上賊》「長腳蟹」一角一劇成名，人氣急升，之後仲跳入大銀幕與影帝黃秋生拍攝電影《Laughing Gor之變節》，而近年更以《愛．回家之開心速遞》「熊若水」入晒屋，形象討好！

相反，Dickson星途麻麻，加入無綫後冇咩大作為，多數都係演小角色，之後暫退幕前轉型做健身教練，雖然喺2015年重返無綫，不過依然未有令人印象深刻嘅作品。

一個事業起飛，一個事業低迷，女尊男卑間接成為感情生變嘅導火線，差距愈嚟愈大，又聚少離多！而兩人離婚亦有迹可尋，呂慧儀Instagram最近一張與Dickson合照已經係2018年9月2日，其他嘅相就以仔仔及《愛．回家》家人居多。

而人前嘅佢就交足戲，今年情人節佢都有提起「老公」：「我同老公（黃文迪）講做樣都要送紮花呀！」但對人歡笑背人愁，原來上年已經離婚，真係令人意想不到……

(on.cc)