藝人方力申（小方）、鄧麗欣（Stephy）、任賢齊、陳瀅、陳家樂、衛詩雅及顧定軒（Zeno）今晨出席慈善步行活動，眾人齊齊主持開步禮，至於原本答應出席的梁漢文就因病缺席。「前拖友」小方及Stephy同為活動的榮譽顧問，而今年孖Zeno參賽的Stephy冇再上演去年同小方經典握手畫面，影大合照時亦相隔6個人。
藝人方力申（小方）今早帶腳傷現身慈善步行活動，雖然見他右腳明顯腫起來，但行動自如，更以小跑步走上台參加儀式：「年年都有跑，係今年整親冇跑，之前試過大拗（柴），最近就小拗（柴），但未去到行唔到路，行得、跑得，但腫啲，聽朋友講去咗睇醫生…」
「話整到啲筋膜唔覺嘅話，過20年需要做手術，自己都好驚，後尾發現韌帶有撕裂要戴腳箍，頭兩個星期要戴住瞓，都好唔慣，但要等個傷口自己埋口，如果唔係就有機會惡化、趷腳，咁冇理由趷腳。（呢段時間推咗唔少工作？）推咗冇做運動，惟有犧牲色相肥啲。」
講到有資料網站顯示他跟舊愛鄧麗欣（Stephy）將會主持今年金像獎典禮…
他即笑話當初一知道好興奮：「有周圍問人。（以為大會未通知？）咁寫得嘅都應該有通知，之後知道唔係都有失望，都好想做金像獎司儀，可以着得好型。（興奮唔係因為有Stephy做拍檔？）唔係，拍邊個都想做。（如果係Stephy你OK？）」
「OK！我哋做娛樂界㗎嘛！實做！」續抵死笑話曾當傳聞是真，夜晚臨瞓前有度定司儀稿，認真爆笑！問到下年會否向金像獎自薦與Stephy擔任司儀？他竟反而Say No，因為覺得自薦就唔「馨香」，一定是要被邀請，追問同場見到Stephy有打招呼？小方說：「有，唔會尷尬，一年都見好多次，私下有一班相熟嘅朋友。」
至於Stephy就笑言都有收到好多朋友Message查詢，自己亦感到好奇怪：「睇到有嚇親，都有問公司，相信都係大家揣測，金像獎一知道之後都有澄清。」至於問到若果真的被邀請與小方擔任司儀會答應？Stephy即時尷尬起來指：「我諗金像獎唔會咁做，冇乜必要咁樣轉移大家視線。（今日都一齊出活動。）咁多人一齊，係為件事，而唔係為任何人。（呢個活動算係你哋嘅每年一聚？）唔係，平時做嘢都有見面，見到面都冇乜嘢。」
(on.cc)
