64歲的金燕玲今日到商台接受「蜜友」蘇施黃主持的《大玩派》訪問，承認在今年初發現患有子宮癌。節目中金燕玲透露於年廿八（2月2日）證實患子宮癌1期，並於年初五（2月9日）開刀，並要接受6次化療。
金燕玲說：「過年前，阿女返香港探我，有抹片驗查，兩個一齊去做，我有唔好細胞，護士打嚟話醫生想見番我，阿女27號就走，28號護士催我覆醫生，話我報告麻麻地，兩日囉囉攣。」又指個人頂住頂住，1月30日去見醫生，醫生指子宮癌症指數90%有嘢，她說：「佢問我忍唔忍得痛，話痛幾分鐘，驗得清楚啲，真係好痛，痛到不得了，我好辛苦，頂唔到，第二日入醫院全身麻醉做手術，做完等報告，出院時年廿八，自己做之前兩日流眼淚，年廿九做內窺鏡，過年前我流住眼淚染白頭髮，咁都要過年㗎！唔可以樣唔好，就算病都要個樣好睇啲，醫生話睇吓報告點，如果好嘅就做微創，有四個窿仔，但好唔好彩醫生話唔得，初三入院，初四做內窺鏡，初五開刀。」
蘇施黃透露金燕玲是在年廿八證實患病，當時她表現異常冷靜，她說︰「我05年都患過乳癌，身邊人最大幫忙就係唔好出聲，所以我哋冇討論過個病。」及後金燕玲決定好醫生和治療方法，但仍不敢告知女兒Emma和妹妹知道，她說︰「最初只有阿蘇同我最好朋友關之琳知道，最唔想個女知，因為佢一定喊喊喊，好擔心我，我就仲擔心，會令我情緒好波動。」
蘇施黃解釋﹕「佢個女喺英國，唔喺香港，咁遠，幫唔到任何嘢，只會喊同擔心。」金燕玲稱她患的雖然是第1期，但由於是USPC惡性腫瘤太惡，三年後復發機會好大，不可以做微創手術，所以必須要一次過切除淋巴、子宮和盲腸，她說︰「仲有個好似豬網膜咁，全部切晒，要make sure，因為呢個瘤好陰濕，要好仔細做化療同電療，希望可以控制到。做完之後，我諗係咪要講畀個女聽呢？唔講個心唔舒服！」
完成手術後，金燕玲才告知家人，她說︰「因為開刀好弱，我又要作狀，成日同阿女視像，佢問點解我成日咁早瞓。」而令她最開心，是在患病期間，能與妹妹更多時間相聚，她說︰「我都係等佢去完韓國旅行先講，佢開餐廳，好少留香港咁多日。咁我開完刀，妹妹就嚟屋企陪，我好開心，佢從未嚟香港六日五晚咁多，過去幾十年來第一次傾偈，對我嚟講係好開心。」旁邊的蘇施黃即說︰「係最佳治療。」
(綜合報道/apple daily)
