歌手鄭伊健在紅館舉行尾場演唱會，騷後在後台舉行祝捷儀式。
受訪時他表示右手韌帶撕裂的傷勢幾嚴重：「做咗兩場嗰個表演（倒掛），另外四場就用其他嘢嚟搭救， 冇辦法呢啲係意外。（依家受傷情況點？）唔理㗎啦，受傷都要照做，慢慢等佢康復。（覆診？）冇，其實都係休息，個show仲會做巡唱，4月開始去美國、澳門、內地等地，要盡量keep好啲，再做番個表演。（醫生話幾時先好番？）我諗有排。（點樣治療？）唔好郁佢，紮住隻手會好啲，入面全部都係瘀血。」但笑言今晚慶功都會飲酒。
講到剛才踩上台時半隻腳踏空，伊健猶有餘悸表示：「爭啲跌咗落去，舞台上嘅嘢好難講，要賣力係會有少少危險，今次個台好靚但有危險，總之冇事發生就得，嗰個高度就算有咩事最多都係唔好睇，唔會有啲太嚴重嘅嘢。」講到太太蒙嘉慧很捧場，他表示：「佢唔使睇足咁多晚嘅，有時喺台下面。」
相關新聞：【仲特意為阿Sa…鄭伊健：諗番當時同緊邊個拍拖】https://goo.gl/Ey7LnC
問到太太怎樣照顧受傷的他？他笑言：「你估我依家跛咩？第一日隻手係郁唔到，但第二日隻手開始郁到，瘀血出番嚟。」
講到唱歌送給爸爸時感觸，他表示：「不嬲覺得好感動，屋企人一直好casual，我想做咩就做咩。」講到尾聲他有一幕感觸落淚，他謂：「真係唔知點解，觸動到就去做。」提到覺得這六年香港變得很快，他表示：「唔使講得太白，大家開心就得，依家大家太易就着火，所以想有一晚畀大家輕鬆吓，諗吓自己可以點樣處理，我都諗咗好耐。」
(on.cc)
