身為老友的黃子華決定粉墨登場，自編自導自演，為對方拍攝演唱會宣傳短片，子華表示：「咩原因咁幫忙？因為佢買咗間樓畀我，講明我一直可以住，住到第日囝囝大再畀番佢。哈哈，講真我哋真係好朋友，十幾年前喺橫店一齊開工拍戲，日對夜對。」
蘇永康（阿公）今年6月21至22號會在紅館舉行個人演唱會，對上一次開騷，已是七、八年前的事。
子華憶起十幾年前中秋節當晚的情景，他說：「大好佳節得我同佢兩個人孤單度過，兩個人坐喺黃包車上面賞月傾偈，嗰一刻我已經覺得我哋兩個應該喺埋一齊！但係我唔能夠，所以……而家咪當咗佢個仔Jazz係我個仔囉！」
蘇永康坐在子華神身旁，邊聽邊笑說：「其實我今年要開演唱會，初一帶埋阿仔同佢拜年嗰陣，大家傾開，我話我想拍條片放上社交網站宣傳，咁子華即刻兩秒鐘諗咗條橋畀我，之後我話唔識搞，佢就拍心口話幫我搞埋，真係好唔話得！非常之多謝佢。條片入面，佢飾演契爺角色，喺我演唱會期間一力承擔湊仔服務。講開又講，呢個契爺真係唔話得，唔好話我個仔，連我自己都未見過咁大個富格林金幣，佢就送畀阿仔上契，金幣之外，仲有成日送埋好多玩具。阿仔就嚟兩歲，開始識得認人，佢唔係咁鍾意男人，見到我班朋友都喊，但係契爺例外喎，佢好鍾意同契爺玩。」
阿公直言假如演唱會期間，子華肯代湊囝囝，他說：「絕對放心，我驚我個仔玩謝契爺多啲。」雖然愛屋及烏，但子華堅持不擔任演唱會嘉賓，子華解釋：「我已經發咗誓唔會做任何人演唱會嘉賓。我而家鍾意拍嘢，我講真。如果契仔將來入行開演唱會，就等佢大個，真係唱歌先講啦！」
（apple daily）
