藝人陳豪出席「BVLGARI Wild Pop高級珠寶系列」晚宴活動。
提到今次單拖亮相，佢表示太太陳茵媺（Aimee）要留在家中照顧小朋友。
「今日輪到我出嚟做嘢，其實每一次出嚟工作，都要make sure有一個大人喺屋企睇住小朋友，我哋先至會放心。（小朋友好黐身？）都黐㗎！不過如果我哋出埠工作，會提早兩個星期甚至一個月前通知佢哋，等佢哋有個心理準備，所以都唔算好扭計。
（你出門口前，佢哋會唔會好唔捨得？）唔好話出埠，平時喺香港出去做嘢，佢哋每個都要攬晒、錫晒先至畀我哋走，不過我哋好enjoy，呢個係有小朋友嘅樂趣。（你成日錫太太，佢哋會否有樣學樣？）我哋屋企好民主，唔會我哋話點就點，所以屋企係好有愛。」
講到照顧小朋友嘅難處，佢坦言雖然想小朋友學識獨立，但作為父母又想仔女可以依賴自己，所以有好大嘅矛盾。
問到係咪最唔捨得囡囡獨立？佢表示：「囡囡係比較嗲，但其實每一個都咁唔捨得。
（會唔會特別寵囡囡？）我好公平，仔女一樣咁寵。但喺教小朋友方面太太叻過我，我就算鬧佢哋，佢哋都唔會理我，反而媽咪叫就會即刻做。（兩公婆喺湊小朋友方面有冇意見不一？）實有嘅，但我哋嘅性格係唔會嗌交，會攞出嚟理性討論，so far關係都幾好，冇乜拗撬。」
佢續指太太於教導小朋友獨立方面非常有辦法，更力讚Aimee係「好本事嘅女人」。
至於問到Aimee係咪想復出拍戲？佢就表示暫時未有明確計劃。
(on.cc)
