結婚6年，一直積極造人，曾揚言想生一仔一女的她落足工夫，多管齊下，嘗試食療、針灸、睇中醫等。
奈何期間要切除子宮良性腫瘤令生B計劃一度擱置，曾打算領養，及後試過兩次人工受孕，惟均告失敗。
最近Amanda坐言起行領養了一名女嬰，組成一家三口幸福之家，本身亦由養父母湊大的Amanda可謂把愛心延續。
據悉李蕙敏（Amanda）為領養早已作出準備，去年12月，記者發現她到中環為囡囡張羅，購買不少新裝及嬰兒用品，日前還與家傭帶同囡囡到中環出巡。當日下午約3時，戴上冷帽及黑超的她，與家傭推着BB車離開該處商場，B女約8至9個月大，面頰肥嘟嘟，眼仔睩睩極可愛，坐在BB車上不時抬頭望媽咪，愛女心切的Amanda頻頻逗囡囡玩，甚為溫馨。
期間手持飲品的Amanda手指指，示意家傭往乘扶手電梯，當上電梯時，她亦急急扶着BB車安頓女兒，可見寵愛有加！及後她們沿中環往半山的扶手電梯行返寓所，囡囡全程興奮得腳揈揈，Amanda就頻頻為她整理衣衫，母愛表露無遺。
對於領養一事，Amanda接受東網電話訪問時坦言：「我會，實行過，研究吓啦，都進行中喇，準備緊喇。」提到手續進展如何？她說：「唔好意思，唔想講太多。（心唔心急？）唔太急，唔知幾時做到，順其自然啦，我一向好鍾意小朋友，湊小朋友都好耍家，中學時我做補習老師，試過湊成30個小朋友，佢哋仲成日攬住我雙腳唔畀我走㗎。」
至於當日與BB出巡，她則避忌地說：「唔……朋友個BB嚟，因為朋友要工作，我幫手湊啫。」但亦表示愛無分界限，因此領養的小朋友無論任何國籍及性別也沒所謂。問到會否再嘗試人工受孕？她斬釘截鐵說：「唔會，太辛苦喇，仲搞到內分泌失調。」
（on.cc）
