藝人李漫芬（Fanny）同老公Alvin剛度過結婚兩周年，喺呢個咁重要嘅日子，Fanny選擇一家三口同奶奶飲下午茶！
Fanny呢兩年經歷做人妻同人母，佢話真係好感激有奶奶幫忙：「奶奶成日煲好多湯水我飲，因為住得近，佢會幫我睇住囡囡（在心），知我拍劇，仲會整好晒啲餸菜畀我帶走，好多謝佢。」同時Fanny亦感激媽咪嘅支持。
回顧成為人妻兩年，Fanny覺得時間過得好快，每日都好開心好感恩，佢話：「婚前好想成日出街，因為可以同老公拍拖，婚後就愛回家，想快啲返屋企見到個女同老公。仲會研究煮嘢食，廚藝唔可以話好好，但肯定進步咗，老公冇咩點讚我，佢笑我來來去去都係嗰幾味，不過我最叻係煮BB粥仔。」
問到同老公有冇互送禮物？Fanny哈哈大笑話：「紀念日前一晚都有問老公有冇驚喜畀我？點知佢話：『最好嘅嘢已經喺你面前。』戶口加咗你名，你買咩都可以，哈哈。其實係佢理財好差，我要做個精明太太幫佢睇住個戶口。」
Fanny仲話計劃今年9月一家三口去旅行，佢表示：「有朋友嘅BB大囡囡一日，已經坐過兩次飛機，在心因為飲奶粉，所以一次都未去過，因為出門要帶好多嘢，計過9月時間差唔多。」
除咗忙於相夫教子，Fanny亦好努力工作，紀念日嘅前一日佢仲要開廠拍攝新劇，對手都係媽媽級嘅陳敏之，兩人大講湊B經。同時Fanny亦好多謝梅小青畀機會佢演繹呢次角色，因為戲份雖然唔多，但好有發揮。
(on.cc)
