鍾欣潼（阿嬌）、曾樂彤、MIRROR成員姜濤與Anson Kong等於尖沙嘴出席意大利皮具品牌Furla Monogram期間限定店揭幕禮。
提起好姊妹蔡卓妍與容祖兒到北海道旅行，獨欠阿嬌，她說：「我冇放飛機呀，完全唔關我事，而家有屋企，要顧住老公，有家室嘅人你哋明唔明。」
在逼供之下，阿嬌暗示老公下「禁令」，問她是否將丈夫放在首位？她說：「係！大家明啦！老公重要，姊妹都好重要，做人好難。」
她又指老公已經請假，鐵定會跟Joey及阿Sa齊齊到希臘旅行，問她可有幫Joey找個伴？阿嬌即爆指最近為Joey到「金童玉女殿」點燈求姻緣，阿嬌說：「我好神心，我去咗金童玉女殿，好難先有人放個位出嚟，好好嘅，我幫佢全年（祈福），包括姻緣，我結婚前媽咪都有幫我點，點咗就結婚嘞。」
問阿嬌會實際介紹男仔給Joey識嗎？她說：「冇呀！我係宅女，呢樣交畀阿Sa，佢識人多啲，而家物色緊，要搵個好嘅畀佢，佢都要努力，靠自己，外來嘅只係輔助。」
早前患上甲型流感，日前阿嬌又患腸胃炎，問她為何經常患病？她說：「係啦，冇嘢嘅，小病是福，之前去度蜜月，可能流感未清，喺比利時入咗間酒吧，開咗支香檳，唔知係咪啲藥撞咗，我去到餐廳嘅廁所，坐咗喺門口，入到廁所瞓低咗半個鐘，跟住Michael打電話畀我，好嚴重，真係唔可以撞藥，而家好返好多。」
記者笑言老公照顧不周，問阿嬌現時是否要調理身體為生B準備？她說：「佢有照顧我，調理返好身體先，唔好講生BB住。」
(apple daily)
