藝人鄭希怡（Yumiko）不時都會喺IG曬親子照，超級Warm！
近日一家三口同埋一大班老友去咗日本滑雪，連日嚟Yumiko都分享咗好多滑雪片，今日終於到囡囡梁浸浸出場喇！
梁浸浸雖然只得3歲人仔，但其實佢舊年已經學識滑雪，今年仲想挑戰喺山頂衝落去添！
不過喺睇到佢嘅英姿之前，Yumiko就分享咗段梁浸浸嘅蝦碌片！
片入面梁浸浸將對雪靴卡上塊滑雪板嘅時候失平衡，推跌咗旁邊個小朋友，場面都幾尷尬……
但好在係喺雪地，個小朋友呆一呆之後就好快企番起身，睇落都冇咩事。
Yumiko幫阿女留言：「Sorry…. sorry….我真係唔係有心㗎⋯😣只怪我學藝未精⋯」網友睇完段片都話好好笑，仲話好想同梁浸浸一齊滑雪呀！
而黃依汶（Emme）都有為囝囝陳真報滑雪速成班，陳真雖然第一次玩Snowboard，但都好快上手，仲滑得相當有型有款！
Emme見到囝囝靠自己拉住雪兜喺雪地上上落落，突然間覺得陳真大個仔，作為媽咪嘅佢真係倍感安慰呀！
而陳真上完堂後亦已經攰到冇晒電，返到酒店後就即刻喺張床上瞓着咗，十分可愛！
Emme喺社交網留言：「對於一個2歲多嘅小朋友玩Snowboard，爸媽表示很滿意，只不過玩左（咗）就個（嗰）一陣就暈倒。」
(綜合報道/on.cc)
