金像影后毛舜筠早前出席賀歲片新春團拜，她表示剛與大女及老公去完6天日本旅行返港，笑言去旅行仲辛苦，因為每日都要好早起身跟隨大女編排的節目去玩，但她大爆差點不能如期返港。
「最後嗰日上就落大雪，有其中一條跑道封咗，好彩冇取消航班，只係Delay（延遲）起飛，提早咗一日時間去機場做露宿者。」
問狂食可有增磅？她笑說：「識揀嘅，但一家人可以一齊去玩好開心，每年聖誕節、過年一家人一齊最重要，依家調番轉細女返學，就同大女去，好彩總有一個係隔籬。」
與老公區丁平婚後恩愛如昔，今日係區丁平生日，毛舜筠同大女區令山同壽星慶祝，仲喺網上晒出一家3口合照，留言表示：「Happy Birthday to my hubby！」
佢哋一齊去食咗豐富晚餐，又預備咗個靚蛋糕，睇見都覺得佢哋好幸福呀～
不少圈中好友如陳茵媺等亦有留言送祝福，大家仲讚區令山遺傳父母優良基因，好靚女呀，不過今次如果有埋細女喺度就好喇！
（綜合報道 / on.cc）
