【一直有追蹤胡諾言行蹤】陳琪好心痛:最緊要係佢返到嚟

    藝人胡諾言(胡仔)圓夢於4小時內完成全馬賽事,以3小時45分04秒衝線,而老婆陳琪到維園終點站迎接胡仔,認真Sweet爆!二人碰面一刻陳琪一臉興奮,但一睇見胡仔左膝明顯擦損的傷口,即心急如焚問:「吓!你受咗傷?」隨即上前查看傷勢,看來相     當擔心!

    之後他們一同受訪,期間陳琪幫胡仔戴上獎牌,胡仔坦言今次比賽比較辛苦,因為風大雨大:「又側風、又逆風,加上又落雨,而自己隻腳又發炎,跑到同去年差唔多成績就夠㗎啦!」

    續指跑完2019年第一「靚跑」緊接有兩個工作,故覺得今日寧捨充實兼有意義:「好似跑數咁,雖然嚟咗跑步,但我都係有搵食㗎!」

    講到左膝損傷,胡仔淡定表示只是擦傷少少,並冇大礙:「係自己唔小心仆到,手都有擦到少少。」

    陳琪即插嘴指一直都有用電話追蹤老公行蹤,一睇見對方突然減慢速度都擔心是否有事發生,又趁機訓話:「最緊要係佢返到嚟,都知道佢隻鞋濕咗會跑得好辛苦,希望佢唔好再玩啦!頭先一見到佢太開心,之後先知佢整親,佢又唔出聲!」

    胡仔即呵番老婆:「咁我係大人嚟嘛!意外嘅嘢都唔想,我晏晝同夜晚都有嘢做,都唔會Chur得咁盡,成績過幾日就會唔記得,所以都唔使緊張,盡自己能力,Enjoy過程,安全完成就足夠。」

    追問陳琪是否不想老公再參加全馬賽事?她依舊表示:「盡量最好唔好啦⋯⋯覺得做運動就唔需要畀壓力自己,但如果佢鍾意跑我都唔會阻止佢。(試吓親子跑?)OK呀!嗰啲跑好短㗎咋!」
    胡仔求饒謂:「依家做到興趣之餘,我又搵到食,所以算啦!畀我玩啦!」而陳琪亦再冇力反抗,只好答應。

     

     

     

     

     

    (on.cc)

    SHARE