今日先被爆有拖拍，點知轉個頭就報喜已經閃婚！恭喜恭喜！
今日情人節真係多喜事！35歲嘅李彩華喺微博宣布婚訊，佢留言：「Rain + Eric = Mr & Mrs Huang 」佢晒出兩人嘅Q版公仔，仲有佢同老公嘅利是封！
李彩華老公係6呎「鋼男」Eric，喺內地做鋼鐵生意，絕對係筍盤一名，佢哋先拍拖半年！
可能李彩華見到戀情曝光(相關新聞:https://goo.gl/vFpDQD)，而佢自己又已經結咗婚，畀人爆不如自己爆先，趁情人節公布喜訊，夠晒浪漫！依家有情人終成眷屬，真係恭喜晒！
東網聯絡上李彩華，佢難掩喜悅表示：「其實今年2月喺內地領證結婚，之後會喺香港和內地都會擺酒。（雙喜臨門？）唔係，有好消息一定會同大家講。因為我仲有兩部劇要拍，生小朋友都有計劃，諗住生一至二個。」
佢話同丈夫Eric認識咗五年，自去年回復單身後大家見面時間多咗，半年前先開始拍拖，佢話：「去年十一月，佢去片場接我收工，突然間跪低向我求婚，真係好感動，我就應承咗。」
李彩華表示婚後會香港、內地兩邊生活，媽媽對女婿都相當滿意，佢話：「媽咪都覺得佢好好，話佢好孝順。成件事我覺得好感恩。」
二人早前已影結婚相，見Rain身穿「白色小背心」款、拖尾白色婚紗，簡約氣質，盡顯優雅大方，好靚啊！
(綜合報道/on.cc)
