【問到劉愷威就話…】吳家樂:不停為小朋友擔心

    藝人吳家樂出席活動,他表示新年期間沒有出埠,因為要拍攝新劇《唐人街》:「食咗好多蘿蔔糕,唔敢偷懶喇,因為套劇要打,全部都要除衫。」講到早前被網民拍得新年前夕一家五口去日本旅行,他表示:「其實係聖誕節,當地都有好多香港人,冇乜所謂啦。其實我湊仔好正常啫,但香港人通常生一個起兩個止,我就生比較多。」

    提到早前跟古巨基(基仔)、劉愷威等在初二聚會,家樂笑說:「因為基仔嘅演唱會,所以我哋成班出嚟,其實本身同愷威係訓練班同學,又係明星足球隊,所以一直都有聯絡。好多時大家都會奇怪原來我同阿邊個熟落,其實一路都有,只係依家網絡發達,擺張相畀大家見到,好似我當年都有睇住傅明憲試鏡,因為我嗰陣時做緊幕後。」

    談及愷威與楊冪去年宣佈離婚,問到愷威現時心情?家樂表示:「我哋朋友好少提呢啲,就算我同基仔識咗咁耐,我都冇問過佢同Lorraine係咩關係,直到佢同我講話佢結婚,我就話『哦』、『係呀』,因為我本身不問世事,加上有小朋友嘅家庭係好忙,不停為小朋友擔心。」

    家樂透露自從有小朋友之後,經常都很忙碌,有很多事要擔心。就算小朋友放假,他亦要工作,所以都無暇顧及其他事情,但他認為為小朋友犧牲是很正常的事。問劉愷威可有跟他傾湊小朋友經?他謂:「時間唔同咗,我out咗喇!我嘅小朋友同佢嘅小朋友莫講話隔十年,就算隔兩三年,學校制度都唔同晒,所以只可以作參考,我哋係有傾過讀書嘅嘢,父母一定畀最好嘅嘢仔女。」他自言經常看到一些社會新聞,認為生離死別的事沒人能預知,所以會花時間做多些善事,亦認為一家人可以齊齊整整、健健康康,已經是最重要的事情。

    (綜合報道/on.cc)

    SHARE