名模周汶錡（Kathy）婚後育有兩個寶貝仔Jacques同Avner，兩兄弟超可愛！好多網民都Like爆佢哋～
兩名「小情人」長期穩佔社交平台的萌爆B兄弟之列。
剛剛踏入豬年，《蘋果》早前就邀請他們三母子親子樂，學整豬樣、大桔、元寶曲奇。
兩兄弟入廚當然是小初哥，最初哥哥Jacques較慢熱，細佬Avner反而不客氣，在導師Crystal Wong指導下，用麵粉棍搓曲奇粉糰。
Jacques觀察了一會才肯跟細佬一齊搓，搓完粉糰就印模，之後齊齊陪Kathy將待焗的曲奇放入焗爐。
之後哥哥又負責畫豬仔、大桔，再細心將橙色糖霜平均分佈在曲奇餅上，最後一步就是把大桔葉仔與樹枝貼上曲奇，全情表情凝重，十分可愛。
Jacques還哥哥mode上身，指令細佬不要偷食，不過Avner一於懶理，不停拿來吃，更一邊食一邊跟媽咪說：「Hungry」。而Jacques整完大桔曲奇，再學做豬仔樣曲奇，塗上糖霜及豬鼻仔後，他即輕鬆笑笑，又拍手表示成功，相當鬼馬。
訪問期間，Kathy笑言有了兩個囝囝後，都有辦年貨過年，就像小時候和媽咪去辦年貨一樣，她說：「新年習俗買新年衫，年年都喺香港過，年廿八洗邋遢執吓屋，細細個都係我搞全盒，我同媽咪去買時專揀晒自己鍾意食嘅糖，而家全盒基本上買啲小朋友可以食到嘅糖，佢哋一開就好似我哋以前見到銀行簿仔一樣，雙眼發光！朱古力行先，揀啱佢哋食嘅嘢係唔易。」
Kathy表示過年有好多開心童年回憶，好鍾意一家人團圓的感覺，都希望兩個囝囝可以體驗：「好似行花市，而家佢哋做到嘅嘢，例如入錢封利是，會畀佢哋試，暫時搞破壞嘅嘢就唔會。」
提到兩個囝囝的利是錢如何處理？她說：「幫佢哋儲起，以前細個利是錢媽咪攞晒，而家佢哋利是、生日，我幫佢哋做啲慈善，幫佢哋助學。」拜年當然要講吉利說話，Kathy透露大仔返了幼稚園後，廣東話進步不少：「廣東話講多咗，國語少少啦，有一次俾佢考番轉頭，佢畫咗三個生果，一個蘋果、香蕉同提子，佢問我嗰啲係乜，我照講提子，我個仔答我『葡萄』，俾佢考番轉頭，返學真係有啲用。」
問到她有否檢視一家人生肖有否犯太歲，她表示囝囝年紀尚小，不過她自言今年犯太歲：「其實我冇乜習俗，12生肖一年有4個犯太歲，即係三分一機會，隔幾年就遇中一次，我覺得冇所謂，拜吓神我都會，年頭拜吓神，年尾還吓神，攝太歲都會。」
問Kathy豬年會否有計劃生多一個，追一個豬BB？她即耍手：「未考慮住，唔使，食吓豬餅就得啦。」問她會否催新婚的妹妹周勵淇快點生豬B，她即笑言：「會，熱鬧啲，催佢快啲，我妹應該快啲，可以同佢哋一齊玩。」最後，提到新年願望，Kathy笑言兩個仔要身體健康：「最緊要身體健康，快高長大，唔好快高長大，唔好咁快，佢哋大得太快，由抱住到而家走嚟走去，太快，時光飛逝，開開心心最緊要。」
(apple daily)
