藝人吳綺莉與女兒卓林母女關係時好時壞，卓林曾離家出走到多倫多，直到去年11月與網紅Andi於溫哥華註冊結婚後返港，因冇錢交租被迫遷離，最後由吳綺莉接濟。雖然母女「團聚」，但母女關係繼續時好時壞，仲話要「磨合期」。
吳綺莉琴晚突然喺社交網上載「新抱」Andi嘅多張性感舊照，當中仲有去年4月卓林求救嘅對話截圖，上面寫住「I am in danger（我有危險）」似乎意有所指！
之後仲以英文留言：「施比受更有福，親愛的，新年快樂，祝你萬事如意，免費午餐和自由戀愛。（More blessed to give than to receive my dearest, happy new year, wish you all the best. free lunch and free love）」祝福網民新年快樂之餘，仲疑似揶揄Andi！
佢又覆好友話：「沒好好教好孩子，不想朋友們白幫。」
有傳傳媒聯絡吳綺莉，問佢其實咩事？
之後佢爆Andi大鑊，指Andi同卓林出走後周圍租地方住，但又唔肯搵工，不停向佢嘅朋友借錢，令佢感到好為難…
「我嘅朋友唔係白幫㗎，幫都有限度，唔想欠人太多人情！（你有冇出手？）梗係有！其實我個女得19歲，又冇讀書，佢哋都可以搵份工啫，餐廳侍應都係一份工，職業無分貴賤！（佢哋唔肯搵工？）佢（指Andi）同我講當年教幼稚園月入30幾萬，佢話自己患有人群恐懼症，唔可以隨便搵一份要面對多人嘅工！」今次吳綺莉講呢件事出嚟，似係想斷卓林Andi「米路」。
講到卓林求救截圖，吳綺莉就話原來係求佢幫Andi，令佢好無奈：「我個女震晒咁同我講，話覺得自己辜負咗太太，搞到佢咁，叫我幫佢，咁我係咪要幫佢籌錢畀佢醫病？公立醫院唔知有冇得睇呢種恐懼症呢？」
至於卓琳就回覆傳媒：「其實我現在都好努力做嘢support自己，佢要無端端cap低一張一張咁load上去都好花時間，佢明明後面都好晦氣，明明係想attack我，所以有少少唔開心。」
(綜合報道 / on.cc / appledaily)
