正懷有第二胎嘅前港姐張嘉兒近日撇甩囡囡，同老公去咗馬爾代夫過二人世界。
本來嘉兒都享受呢個假期，但向來係「廿四孝媽咪」嘅佢始終都係唔捨得個女，最後仲搞到囡囡爆喊！
嘉兒喺社交網上載咗一張同囡囡視像對話嘅截圖，相中見囡囡喊得非常淒涼，真係睇見都戥佢陰功。
嘉兒留言透露旅行前已經安排咗好多節目畀囡囡，點知就因為自己忍唔住想同囡囡視像，結果令囡囡一見到媽媽就情緒失控，最後喊到收唔聲。
雖然係咁，但嘉兒都覺得囡囡已經比以前進步唔少…
佢提到：「雖然佢喊到咁，但係我都覺得非常之正常。同埋我覺得佢已經好叻㗎啦。仲以為我去旅行佢每晚扎醒都會喊扭計搵我，但係我家姐同我講話佢有問媽咪喺邊，不過冇喊所以我應覺得佢好抵讚同埋抵錫。Mommy is so proud of you，Leora.」唔少網民都大讚嘉兒係好媽媽！
(facebook / 綜合報道)
