29歲的王子涵(Ada)最近獲老竇王晶力撐，入行十年終於有機會當上女主角，在大台新劇《荷里活有個大老千》中飾演丁小雨，做影帝鄭則仕和最佳女配金燕玲的女兒，角色好有發揮。
子涵演技有彈有讚，有人覺得面孔新鮮，有人就覺得演技太浮誇。但論人氣，王子涵已經贏晒，昨日她在Ig開心宣佈followers人數突破30k，即3萬人，她寫著﹕「I love you guys and thank youuuu.」還附送一個大心心，看來真的很興奮。
子涵在社交網上，除上載工作相，還有很多家庭照片，與爸爸王晶、媽媽和家姐一家四口開心歡聚。
而子涵在《荷》劇中要演一個比自己真實年齡細11年的少女，演18歲的丁小雨，她自言最重要有童心，她說﹕「一直都覺得自己還帶一點孩子氣，幸運地得到丁小雨這個角色，讓我好好的把這孩子氣釋放，給大家一個機會看到我另一面。」
子涵在2015年簽約無綫電視，但演出機會不多，曾擔任女性清談節目《姊妹淘》做主持。近年王晶與無綫合作拍劇，即盡己所能加插女兒一些角色，如在《賭城群英會》飾演辣椒仔，到今次《荷》劇更讓子涵得償所願擔正做女一。子涵曾說過年輕對「靠父蔭」三個字好反感，長大後卻看開了，接受爸爸幫，或能走出困局。
王子涵今日接受傳媒訪問時坦言收到劇本已好開心，因為跟自己好相似，她說﹕「其實唔止我一個女主角，仲有李施嬅、張慧儀、文凱玲、劉溫馨同陳雅思。睇劇本時已經好開心，角色古靈精怪又寸嘴，好似我。最開心係遇到kent哥呢個對手，係好肯教後輩嘅前輩，好細緻嘅嘢都要做得好清楚，仲有金燕玲、湯哥(湯鎮業)，可惜同秦沛大哥冇對手戲，係一個遺憾。」
Kent哥是劇集中的靈魂人物，不少網民及觀衆都大讚他的演技出色！
對於網民有彈有讚，子涵直言有留意﹕「兩邊comment都要睇，唔好嘅comment，睇完令自己盡快進步。讚係一個鼓勵，但唔好人讚就好high，但值得擁有嘅，大家都辛苦咗咁耐。」
被指靠阿爸王晶，她無奈地說﹕「都俾人講咗咁耐，免疫咗，人講乜控制唔到，無論你幾努力都好，都有人鍾意同唔鍾意，冇辦法，做好自己就算，可能你覺我講得好行，但呢個真係我心裏面覺得嘅事。」
(facebook / appledaily)
