現年63歲嘅陳榮峻，舊年同58歲吳香倫發展嘅黃昏戀開花結果，兩個人去年7月喺一間教堂舉行婚禮，陳榮峻嘅媽媽、子女同孫仔四代同堂出席，真係戥佢哋開心。
咪以為佢哋結咗婚又一齊咁多年就唔再浪漫，日前《蘋果》記者喺圓方撞見陳榮峻同吳香倫兩公婆，佢哋又玩自拍又十指緊扣行街，畀人感覺真係甜到漏呀！
當日下午4點左右，陳榮峻同吳香倫喺圓方商場出現，同行仲有一位女友人，陳榮峻着住件黑色有紅色花花嘅外套，吳香倫就着住藍色恤衫襯牛仔褲同挽住個紅色袋，牛仔褲度仲有啲花花，同老公打扮好相襯。
佢哋一行人見到商場嘅新年佈置，都忍唔住自拍影相留念，跟住陳榮峻一手拖住老婆行去搭扶手電梯，就算搭緊電梯，佢都係拖實老婆，然後同女友人拜拜後，兩公婆去停車場攞車離開。
記者日前問番陳榮峻，原來當日佢同吳香倫啱啱做咗雜誌嘅情人節專訪，嚟緊情人節係陳榮峻同吳香倫結婚後第一個情人節，相信陳榮峻到時會識做畀啲驚喜氹老婆開心嘅。
(apple daily)
