36歲黃智雯演藝學院畢業，主修舞蹈及戲劇，早前去咗韓國拍節目《一個因去跳舞》，要日日排舞，挑戰做韓國練習生，真係完全感受到做韓國藝人嘅辛酸，噚日嗰集講佢做周子瑜同f(x)成員Krystal嘅「師妹」到翰林藝術高中，佢以為就咁去上堂學嘢。
點知節目組忽然安排佢參加入學面試，表演嗰時，黃智雯被老師叫停，同佢講要感受節奏，同埋提佢舞蹈最基本係聽音樂，黃智雯雖然面有難色，仍然畀心機跟足老師指導去跳，跟住上model堂又冇啲「同學」咁高，搞到佢好尷尬，黃智雯喺節目話：「我而家自信跌到零。」
不過佢都盡量學catwalk同眼神，黃智雯搞笑咁形容model嘅眼神係目中無人。
上完堂，黃智雯叫啲同學估佢幾多歲，畀咗同學提示係「我年紀可以做到你嘅媽咪」，有一個男同學估佢40歲；
跟住黃智雯學跳舞不時甩Beat，同埋一班十幾歲嘅年青人一齊跳舞，網民都戥佢辛苦，留言「跳到勁硬」、「啲動作甩晒Beat」、「講真佢都算係咁啦，咁嘅年紀。」
黃智雯第一次學跳女團嘅舞步，坦言唔敢睇小K-pop舞蹈，因為成隊人要跳得相當合拍，唔可以分心，亦要留意走位，見佢不時甩Beat兼走錯位，當佢成功跳完其中一part舞…
黃智雯即眼濕濕咁講：「過程好刺激、係好玩嘅，有時係要人逼，好似將自己嘅小宇宙逼出嚟，因為一錯咗就怕連累同伴，壓力真係好大。」佢自言冇諗過跳到咁唔協調。
網民睇完都鼓勵佢，讚佢好認真學習，見佢喺噚晚播嗰集已經有進步，而噚日黃智雯都喺Ig講自己係喺完全冇心理準備下，被踢入面試室，用15分鐘背韓語對白，仲要喺半個鐘KO快過閃電嘅breaking，播完呢集，黃智雯開live亦再次講節目組喺拍攝前，真係完全冇同佢講要參加入學面試。
(appledaily)
