【記足十年連留三次言】唯唯:一直放在心中好難受

    呢兩日社交網好多藝人都玩緊#10yearchallenge,佢哋都將自己10年前、10年後嘅相放上網,最近憑《大帥哥》天嬌一角而人氣急升嘅譚凱琪就將2009年舊相同2019年新相拼埋一齊對比,佢留言話:「人生有幾多個十年」,相中所見佢真係冇乜點走樣,淨係條眉變咗!網友見到佢張相都話:「都係咁靚」,仲問佢用開邊隻防腐劑添!

    仲有Kenny關智斌、阿Sa、汪詩詩同甄子丹等藝人都有玩!

    一向出名轉數快嘅森美就上載梳洗前後嘅相:「唔洗(使)等十年先有改變啦!朝頭早起身梳洗前同梳洗後!十分鐘都夠大分別啦!」

    而一向好鍾意開心share嘅張繼聰(阿聰)梗係玩埋一份啦,佢上載10年前後嘅合照,明顯依家嘅佢係大隻咗、有男人味咗,最重要係散發自信!

    其實只係平平無奇嘅一個Post,點知觸發咗梁競徽(前名:梁烈唯、唯唯)嘅神經,佢喺阿聰個Post留言話:「話說10年前我在tvb五廠外的走廊遇見你,當時係夜晚,而你帶(戴)住副黑超!我跟你友好點頭 say hi!但你不理我直接走過~~~」阿聰即回覆說:「咁明顯我視力有問題啦!」

    梁競徽坦言一直將件事放喺心中:「當時我好難受!一直放了在心中,就算之後大家認識了我也沒有問你為何!但這些年我終於知道,當時的你正受著(着)很多壓力!現在我更加知當時的你為何會這樣,我知道一定唔會係因為你串(寸)!所以現在看見你很有自信很有魅力,我真的很為你感到開心!同時也給了很多動力和信心給我,其實真係要感謝你!感謝你的分享!」

    阿聰回覆話:「大家努力兄弟,應該純粹係發雞盲。」

    一場兄弟互相鼓勵大講真心說話真係好令人感動,網民話估唔到事隔十年,梁競徽都仲咁好記性。又係嘅,放一個人喺心上,係會記得佢做過嘅事。

    不過有網民睇完之後,忍唔住代阿聰出頭,寸競徽真係好小器,一件咁小嘅事都記足10年,人哋都已經好禮貌咁回覆,點解仲要咬住唔放?

    (綜合報道/on.cc)

    SHARE