劉德華嘅跨年紅館演唱會，上周六開鑼，首晚華仔愛女劉向蕙，由媽咪朱麗倩陪住現身，欣賞爸爸精彩演出，成為演唱會亮點之一。
連日來到紅館捧場嘅藝人亦星光熠熠，唔少華仔老友都排住隊去睇騷，繼日前一班老友苗僑偉、黃日華、汪明荃和羅家英夫婦、李克勤和盧淑儀夫婦、林嘉欣同莫文蔚等人，噚晚就輪到周秀娜、姜皓文等人都有往捧場。
仲有仲有！就係華仔舊拍檔陳玉蓮喇～
華仔同蓮妹83年合作拍金庸經典作品《神鵰俠侶》演楊過及小龍女，雖然多年來劇集重拍再重拍，有唔少人演過呢兩個角色，但係華仔同蓮妹，喺好多人心目中都係最經典一對，無人能及。
其實，蓮妹早於11年已喺華仔演唱會出現，當年華仔慶祝入行30周年，蓮妹便以壓軸嘉賓身份亮相尾場演唱會，陪住華仔唱《情義倆心堅》。不過，噚晚就未有上台演出，只在台下做觀眾，但亦有去後台同華仔攬住影合照。
（Apple daily）
