藝人陳家樂早前宣佈與拍拖三年的女友余香凝分手，兩人曾共患難，一同經歷事業低潮，之後兩人終於捱出頭來，女方獲金像獎提名，再開始發展唱歌路，而男方則慿《逆緣》飾演爺爺一角爆紅，但無奈三年情已逝。
陳家樂當時開腔護舊愛，直言余香凝是「我最親的親人」二人雖然已經分手，但相信仍是一對會互相鼓勵的朋友。
事隔幾個月，陳家樂疑似有新戀情！
大前晚（1日）約7點，讀者王小姐指喺中環萬宜大廈一間好平民化嘅日本餐廳，遇見陳瀅同陳家樂一齊撐枱腳。讀者王小姐話陳家樂較先到達餐廳，由於係周六晚上，好多OL都放假，所以餐廳比較少人。佢話：「陳家樂嚟到坐咗入面，陳瀅之後到就坐外面，佢哋叫咗好多嘢食，佢哋傾得好投契。」見陳家樂幫手燒嘢食，同陳瀅好似有講唔完嘅話題。
佢哋共用一碟醬油，見家樂想將魚生遞向陳瀅嘴邊，陳瀅亦有低下頭，隱約聽見佢笑咗幾聲，但最後都冇食到，家樂自己食番。雖然餵食失敗，但家樂笑得好甜，個樣明顯好冧。大約8點，兩人便埋單離開。
大約8點，兩人已經埋單離去，呢個時候佢哋表現得好避忌，着白衫嘅陳瀅先行步出，陳家樂則落後幾個身位，兩人好有默契扮唔識，雙手插袋嘅陳家樂擔天望地，仲刻意望住右邊牆，扮陌生人扮到好唔自然；之後兩人搭扶手電梯到停車場，全程都係保持距離冇傾偈，扮到唔係約埋蜜會咁款。
兩人落到停車場後，急步上咗陳瀅嘅跑車，而負責駕駛嘅陳瀅，將跑車駛到停車場出口時，停低足足20秒都唔開車，好似想睇吓有冇傳媒追訪，而當佢再開車時，由於小路出大路關係，陳瀅打開黑色玻璃車窗一條罅仔，望清楚路面情況，坐隔籬嘅陳家樂都幫手望兩眼，雖然當時冇其他車輛經過，但兩人都喺出口停咗10秒先出車，十分謹慎。
之後由陳瀅做司機，踩行油孖陳家樂返去位於尖沙嘴嘅香閨，記者守候至凌晨12點，都冇見陳家樂離開。差不多同一時間，陳瀅亦有更新ig story，上載一位女性朋友食水煙嘅片段，仲清楚見到對面海有棟ifc，似乎係想聲東擊西。
「雙陳戀」疑於今年8月合作拍攝《廉政行動2019》擦出愛火花，當時陳家樂啱啱先同舊愛余香凝分手兩個月，被問到會唔會同陳瀅有發展機會時？家樂仲話自己係絕緣體：「第一次合作咁快就講感情事，熟絡啲先啦！我哋之前見過幾次，最近開會先至第一次傾偈，佢好肯同我傾偈，好nice。」估唔到短短4個月，陳家樂已經被女神陳瀅俘虜，「雙陳戀」火速撻着！
29歲「宅男女神」陳瀅前年與四太梁安琪嘅大仔何猷亨爆分手，之後二人仍頻頻約會，一齊睇煙花，又甜蜜茶聚，但卻否認翻撻。
「女神」回復單身梗係多人追，緋聞一隻手數唔晒，周志文、張振朗、林景程、溫家偉、方力申、羅天宇……仲有「衣架大王」個仔劉德俊等等，魅力沒法擋。
(綜合報道/Apple daily)
