Vani早前請咗華仔接受佢主持嘅節目《雲妮鍾情》訪問。
節目中Vani講到今年5月，佢做完七個小時手術，半夢半醒就見到華仔嘅花果籃，令佢好開心。提到同華仔相識28年，由記者年代到依家，更忽然感觸落淚。
之後華仔提到其下月演唱會主題曲《My Love》MV中，出現一對銀髮老人家舉行婚禮嘅場面，華仔話：「係想表達呢個世界，好多嘢都可能諗太多，有時可能整個世界都準備為你祝福，好似劉德華談戀愛，歌迷會唔鍾意？會唔會諗太多呀？其實只要話畀佢哋知，都會衷心祝福。」華仔又舉例早排圈中都有一對結婚，都係呢個情況，但佢冇開名講邊個，笑住話：「費事話人哋，冇理由話人上年紀嘛！」Vani話呢啲叫黃昏戀，華仔就笑住話佢作咗個名叫「黃昏又黎明」。
訪問中，Vani問華仔當年跳落台救歌迷一事，問佢知唔知當時有幾高？佢就話：「我唔記得有幾高，我記得我落去真係揮拳，睇番有啲內疚，冇諗過互聯網世界咁open，不過覺得真性情表達ok！」
Vani之後更單刀直入問華仔係咪一個好直白嘅人，華仔話：「最唔直白係對住愛人，屋企我會表達，係唔知點解。可能係拍戲習慣咗一啲可歌可泣嘅愛情故事打動你，可能生離死別先會感動。細水長流嘅歌曲電影唔會太過打動我。」華仔話經歷太多戲入面嘅人生。
華仔覺得除咗寫劇本定咗角色性格之外，一個演員都會畀到角色生命。某程度上唔同角色嘅愛情裏面，多多少少都會有自己嘅愛情觀，佢用電影《天若有情》為例：「即係話JoJo（吳倩蓮）、華Dee（劉德華）我都記得嘅，我哋談戀愛時經歷過，到底係朋友定係愛情呢？其實愛情我好精忠，到一個critical moment（關鍵時刻）朋友需要我，我可能擺低女朋友，唔係話犯法呀。」
華仔話：「現實中如果有個朋友失戀，需要自己嘅時候，就算依家同女朋友食緊飯勒，我都會話『sorry』，安撫咗佢，好似JoJo咁，你自己跪喺度，有乜嘢同佢講啦，自己偷偷地走咗去。」華仔話依家男性就係冇做到「偷偷哋」，女方可能偷偷哋就會冇事，唔好好似應該咁，等女方有個落台階，換句話講尊重另一半好重要。
華仔用嚿年墮馬意外，解釋外間有人話自己「經過大劫，脫胎換骨」：「唔會跌一跌就叻咗，只係明白多一樣嘢，會突然有嘢影響你全盤計劃，人生所有嘢準備好晒要停。我自己覺得當我卧床3個月，以為可以落地行，原來唔得仲要坐輪椅。」華仔最後前後8個月先可以行。講到卧床經歷，華仔話開頭2個月可以落地開始，就鍛鍊自己雙手由床上落輪椅去廁所，佢話：「之前仲要接受姑娘遞個尿壺畀你。」
華仔話第一日、第二日好尷尬，到第三日明白大家各自做緊各自角色，佢話：「個角色一定要清楚，唔係話病嘅時候『我都要係劉德華』，冇得扮，惟有你話畀佢聽我靚仔喺心靈，用第二方面再呃過佢。」
(Apple daily)
