【錫足15秒】陳展鵬單文柔超級甜

    前日係陳展鵬同單文柔結婚好日子,各大小傳媒一早霸定靚位影一對新人。由朝早酒店出發,到海上註冊儀式,一對新人都保持低調,即使係「自己友」tvb想訪問幾句都say no。直至傍晚一對新人終於正式出嚟會見傳媒,在場記者都有要求一對新人影番張錫錫sweet sweet嘅相,但新郎哥竟然「拒絕」,話要等「發相」,真係藝人之中絕無僅有。

    好喇,等了又等,新一批靚相終於出爐!

    新娘子一如所料,都係咁靚女,佢哋喺遊艇上已經啜到好肉緊,直到晚上婚宴,一對新人喺賓客起哄下錫足15秒,連咀三次,真係睇見都覺得好甜。

    而有份出席婚宴嘅嘉賓亦陸續喺社交網上貼與一對新人合照,當中感覺最歡欣嘅就係一班亞視之友能夠聚下舊,大合照中見到鮑姐鮑起靜、江美儀、林子博、杜挺豪等,袁文傑留言:「估都估到我哋有幾開心!飲多幾杯賀一賀佢,恭喜晒一對新人。」

    而張寶兒、劉穎璇等亦有上載海上註冊合照,寶兒話﹕「見證著我愛的一個女孩子,從此換上新的姓氏,很莊嚴,很神聖。祝福你們倆,因為0.5+0.5=1和1+1>2,要幸福一輩子。」

    另外,傳媒亦有喺酒店門外等候,但一直見唔到一對新人。而陳展鵬與單文柔今晚再有一場婚宴,主要請娛樂圈朋友。

    (蘋果日報/on.cc東網)

    SHARE