現年35歲嘅蔡卓妍（阿Sa）與百億富二代男友石恆聰（Anthony）雖然拍拖只有一年半，但就有傳兩人有意明年底拉埋天窗。其實阿Sa同男友相戀以來，不時拍拖外遊，感情穩定，今年5月好姊妹鍾欣潼（阿嬌）喺美國搞婚禮時，更將花球直接交到阿Sa手上，做到出晒面希望佢成為下一個新娘！
而早前阿Sa滑水撞傷額頭搞到留疤，男友緊張得四處問人，並搵嚟整容醫生為女友療傷，細心體貼，阿Sa又點會感受唔到男友幾咁錫自己？
雖然曾有過一段婚姻，原本對再婚看淡，但「對的時間，遇上對的人」，開心又幸福就得啦！
阿Sa話﹕「無咁嘅事，唔係事實，都唔知點回應 ，所以唔回應。」而阿Sa經理人Mani亦說﹕「沒有這件事。」
不過，阿Sa其實每次提起男友個樣都係甜絲絲，雖表明感情事要低調，但不排除會閃婚。阿SA不時讚男友值100分，對佢溫柔又體貼，曾被追問係咪同居，佢回應話：「有分數啦，唔想交代太多私事，總之樣樣都幾好。」據了解，阿SA早已融入男友嘅屋企，與男友家人關係亦好好，之前阿SA去印度買珠寶，石恆聰嘅家姐都有陪佢一齊去。而阿Sa同祖兒、霆鋒、關智斌、Yumiko等去遊船河，Anthony亦會相隨，與阿Sa老友都好玩得埋。
(on.cc東網/蘋果日報)
