日前公佈累積收視超過100億點擊，佘詩曼話：「之前冇諗過可以達到，依家心想事成當然好興奮，哈哈，不枉本宮心機算盡去演繹！」
掀起中港台三地煲劇熱潮嘅大陸劇集《延禧攻略》，唔單止阿佘覺得開心，身為製作人兼監製嘅于正，事後喺微博貼兼暗示會開拍續集：「透露一下《延禧》二的故事：前緣再續，非遺再傳，唯獨愛與美食不可辜負！」
《延禧攻略》中佘詩曼飾演由忠變奸嘅嫻妃
事實上于正喺14年因為先後因為新劇《宮鎖連城》被指抄襲《梅花烙》，《美人製造》抄襲《邪惡催眠師》而被告上法院，之後沉靜咗一段日子，早前于正接受大陸傳媒訪問，當時佢被問到《延禧攻略》熱爆，可覺得吐氣揚眉？佢話：「沒有，因為我也沒有憋屈過！」之後仲話：「你看無論怎麼別人怎麼罵我，我就基本上就是覺得，事實就事實，不是就不是，就沒有那麼多要去計較的東西。」
提到《延禧攻略》選角過程，于正話秦嵐嘅角色係度身量做，嗰陣開戲睇完富察氏嘅生平，已經覺得非秦嵐莫屬；至於吳謹言呢，于正話係俾佢嘅演技吸引，雖然有唔少人將《延禧攻略》同《如懿傳》比較，于正話實情係一啲都唔同，唔使擔心，兩套劇好好睇，從來都冇諗過要去比較。
另一方面，無綫今日公佈《延禧攻略》嘅播映新安排，由本周（8月20日）開始，一連七晚，星期一至日連續播映，10月5日播映大結局。
新增嘅播映時段星期六晚八點半至十點半，即《流行經典50年》同《美女廚房》。無綫稱，周六晚上同時段安排之多個節目，將待該劇結局後順延播出。
(apple daily)
