【冇理過蝦餃仔就拜拜咗】陳慧琳:到時喺屋企都要戴黑超同set頭

    有一段時間冇喺香港開騷嘅陳慧琳(Kelly),今日現身九龍灣出席「MOOV LIVE陳慧琳Music Stage」音樂會記招,宣佈今個月25日喺麥花臣場館舉行音樂會。

    演唱會除咗獻唱首張數碼EP《Watch Me》內所有新歌,又會唱小部份冇咁hit嘅舊歌,Kelly仲挑選咗五首歌畀歌迷網上投票一首當晚最想聽,而Kelly透露自己心水係《我會掛念你》,因為配合現場樂隊演奏可以玩到好勁。首次喺麥花臣場館開騷,事事要求完美嘅Kelly會換三套衫,因為中間一首歌《打字機》要配合懷舊感覺,所以特別換上一套懷舊衫。

    兩個囝囝已經放暑假,Kelly笑指自己喺屋企排練時,不時被囝囝們打擾,問到會否畀囝囝們睇騷?佢話:「唔好啦,佢嚟到我就慘,好忙,睇吓點先。」完成今次個騷就會一家人去旅行,未知去英國定美國。近日忙於排練,湊囝重責交畀老公,不過老公都試過有晚同朋友出去飲酒睇波放鬆吓。

    Kelly指兩個囝囝似佢同老公係斯文派,運動都係鍾意較靜態嘅乒乓波,大囝蝦餃仔已經九歲大,亦有自己電話,問到囝囝會否偷影佢?佢就話:「成日偷影,不過冇set佢電話可以上網,不過遲啲都控制唔到,到時喺屋企都要戴黑超同set頭,最緊要教佢打格仔,打媽咪塊面。」講到如果格仔打錯喺身會否仲尷尬,Kelly笑說:「係呀,仲衰過打臉。」

    原來蝦餃仔已經同媽咪傾男女關係,Kelly話:「佢有同我講要鍾意好女仔,佢又話女仔好容易搵到男朋友,男仔好難搵到女朋友,其實佢每一年都會揀一個女仔鍾意,都靚㗎,但係呢好多時對方冇反應。今年嗰個亦都係呢冇理過佢,(學期尾)就拜拜咗。」

    (蘋果日報)

    SHARE