【剛完成大手術】梁漢文:要做嘅嘢都做晒

    世界盃開始咗半個月,16強都踢咗一半,向來都係波牛嘅梁漢文(Edmond)噚日話今屆世界盃都未出過去睇波,點知一睇就出事……

    平時都有踢開波同睇波,但今屆世界盃只係睇咗一場就出事。(ig圖片)

    Edmond喺前日凌晨3點左右,喺社交網貼咗張住院相,額頭貼住大大塊紗布,表情有啲傷感,佢留言:「突然心血來潮打俾我兄弟問佢係邊,佢咁啱喺卡拉OK,當時我的感覺直情係緣份到了,可以一齊睇波、點知意外就係意外,冇得解釋,竟然可以一邊唱住人哋想我唱嘅《一世一次戀愛》、個頭直接撞落枱角,流血不止,經過一大輪嘅討論,我決定聽朝做一個大手術,所以我之後會好靚仔good nite,大家不用擔心。」

    有傳媒打俾Edmond慰問,佢話:「其實同寫嗰啲字一樣,出去睇波,到半場時,朋友想我唱首歌聽,唱咗幾句,原來前邊有一級,咁就仆咗埋去,照咗腦無乜事,但今朝要做手術。」點解話做嘅係大手術?佢解釋:「因為個傷口好深,唔係話撼一撼,喺個額頭度都有好幾寸,詳細唔識形容,我都唔知呀,等醫生搞!」

    做完手術神情有啲呆滯

    昨日下午完成手術,向傳媒交代傷勢,佢話縫咗37針,傷口長度就7cm,深度見骨。梁炳又話,要做嘅嘢都做晒,o依家等傷口復原:「o依家等埋單同出去食嘢,都好肚餓。放心啦!多謝大家關心。」之後仲講笑話啱啱出院,鬼打無咁精神,照舊頂頭槌都得,13號會照飛去俄羅斯睇世界盃。

    (ig圖片)

     

     

    (apple daily)

    SHARE