【依種感覺好珍貴好美妙】張繼聰感動到喊:原來好大鑊

    藝人張繼聰(阿聰)嘅大仔張瞻依家11歲,轉眼間話咁快又小學畢業,真係唔經唔覺!

    所以張繼聰都好感慨,佢喺社交網晒出阿仔嘅畢業相兼留言:「時間最奇妙嘅地方係佢好似唔存在咁🍃眨吓眼,哥哥就小學畢業😭好彩可以係(喺)工作之前去佢嘅畢業 睇住佢行上台攞畢業證書,原來好大鑊,會流眼淚㗎😭 依種感覺好珍貴好美妙❤❤ 年輕人嘅朋友們,如果你第時有咩畢業禮,記住,一定一定要叫埋你屋企人 #lifeistoobeautiful」

    為人父母咁辛苦搵錢養家,最開心莫過於見證仔女健康成長,所以網友都好戥阿聰感動。

    另外,阿聰仲晒出一張阿仔張瞻同阿女張靖嘅合照,相中張瞻細心抱住妹妹勁有暖男風範,而張靖仲識得擺三七面影相,真係超可愛!

    (on.cc東網)

    SHARE