【連特首都有嚟!】吳君如幾個月前已經安排好:千叮萬囑今日一定要嚟

    最早到場嘅嘉賓係張學友,講到同佢認識,都係因為以前經理人陳太陳淑芬嘅關係,唔算係經常見面。係咪年年賀壽,學友話都唔係,佢每次開演唱會都有嚟睇。問學友送咩,佢話︰「有問過張家輝,因為佢哋住得近好熟,知道仙姐有個粵劇發展基金,自己就捐咗錢去佢個基金度,作為禮物。」

    講到會唔會上台唱歌送畀仙姐,學友話唔會啦,因為有嘢要做,一陣會提早走。問到會唔會去探張家輝時,順便探埋仙姐,學友笑笑口話︰「都唔會,好少。」至於家輝唔係香港,會唔會幫佢送埋禮,學友話呢啲嘢等佢自己搞掂。

    慶祝90歲生日嘅粵劇界名伶仙姐,昨晚喺尖沙嘴洲際酒店筵開40席,吳君如、老公陳可辛同爹哋夏春秋夫婦一齊到賀,君如話:「今晚送禮係做慈善,媽咪係仙姐fans兼且係佢麻雀腳,千叮萬囑今日一定要嚟,因為仙姐90歲生日,所以自己一定要出席,幾個月前已經要我安排定。」

     

    君如透露根據媽咪所講,仙姐打牌好叻成日食糊,自己打牌就好渣,未到媽咪同仙姐級數,佢笑話:「仙姐打牌成日贏,阿爸都好叻同鍾意打牌,我就冇機會同佢哋打。」嚟緊嘅暑假,君如話會同囡囡遊山玩水,囡囡喺暑假後好快就要升中一,開始到達非常時期,依家讀書壓力大同多課外活動,搞到君如自己都好緊張。

    粵劇界名伶仙姐着到一身閃令令、襯埋閃令令手袋,喺契仔陳醫生及特首林鄭月娥陪同下現身,到酒店大堂見記者。喺大堂追星嘅逾半百fans夾道拍掌歡迎,仙姐同林鄭等人影完張合照就由陳醫生等人扶着,慢慢行返上壽宴會場。

    陳善之代表仙姐講生日願望,佢話:「仙姐嘅生日願望都係大家身體健康,個個都開開心心,祝香港好,同埋希望多啲人睇粵劇。」

    唔少嘉賓都陸續到場,好似「七公主」嘅沈芝華、薛家燕、王愛明、馬海倫、陳玉蓮、劉兆銘、劉松仁、倫永亮、張德蘭夫婦、汪明荃、蕭芳芳、胡楓、呂良偉、四太梁安琪,以及前高官馬時亨、高永文、梁愛詩。

    (蘋果日報)

    SHARE