藝人田蕊妮不嬲都圈中好友滿天，尋日（18日）初三就有大班無線藝員上去佢屋企團拜，當中包括吳業坤、唐詩詠、剛生B嘅賴慰玲、車婉婉及何遠東等，而賴慰玲同車婉婉更帶埋囝囝去拜年，認真唔話得。
咁大班人上到嚟，田蕊妮同老公杜汶澤都好識做，杜汶澤擔任大廚準備好多好嘢食，又開紅酒宴好友，搞到佢哋都要影返張舉杯照，不過相中就見到多咗個奶樽，原來係賴慰玲囝囝Marat嘅「Special drink」，同啲酒杯反差極大，唔怪得之畀田蕊妮笑佢飲奶飲醉咗啦！
而可愛到暈嘅Marat，更成為飯局嘅友誼先生，個個都爭住抱佢，吳業坤更加係B不離手，連影大合照都要抱實Marat，吳業坤咁鍾意小朋友，可以考慮搵個伴自己生番個玩吓啦～～
(on.cc東網)
