【講到眼濕濕】靚靚產後抑鬱:冇補救就應該會離婚㗎喇

    張智霖(Chilam)性格樂天貪玩,最鍾意就係同郭富城、沈嘉偉幾個好朋友打邊爐、篤波同打麻雀,袁詠儀直言同Chilam拍拖頭幾年,佢成日會因為Chilam出去玩呢個問題而同對方嗌交:「一個禮拜打足七場,以前真係好嬲,覺得好離譜!為咗呢樣嘢都有鬧過交,咁佢咪好一、兩日囉,但跟住又會係咁。佢最鍾意係話『我今日出去玩呀!』我話唔好啦!我同佢講叫佢唔好出,我話鎖門嘅,佢跟住就黑面喇坐係度,可以坐喺度成晚黑面,見到佢咁我就會算數,叫佢快啲出去就算,咁佢就變返好開心,真係好低能!」

    最離譜嘅唔係Chilam一星期打足七日牌,而係當靚靚生完魔童之後,Chilam都因為去玩而唔陪佢坐月:「我都話我坐月咯,我叫佢陪下我啦,佢就會話『喂你坐月之嘛!點陪你呀!大家都坐係度呀?』但係你唔可以話佢唔盡責,佢只係覺得大家坐係度都冇用㗎啦,咁不如佢出去一陣啦!加上因為我坐月嗰段時間,其實我已經過多年嘅洗禮,所以我已經好習慣佢哋呢班人咁樣玩,其實係幾年之後我已經放棄,我無鬧㗎喇。」雖然已經46歲,但天生童顏嘅張智霖仍然帥氣依然,加上經常同不同女明星合作,其實靚靚會唔會好驚?靚靚霸氣回應:「依家呀?依家我梗係唔驚啦!我咁索!」

    當年Chilam拍劇集《十月初五的月光》時,同佘詩曼嘅緋聞就傳到好勁,當時仲話靚靚成日去現場住個老公?不過靚靚話實情唔係咁:「我一定要藉呢個機會澄清一樣嘢,對阿佘係好唔公平,我唔知點解會將所有嘅責任就會推晒落阿佘度,我對阿佘係無任何嘅,即係我要睇實實佢呀,無嘅!我同阿佘係未合作過啦!但係好多時候喺一啲私底下嘅約會見到呢!我發現佢都係一個幾爽朗嘅人,同埋佢都幾有自己嘅主見嘅人嚟,我唔覺得佢會有啲咩問題。」

    靚靚仲話唔覺得日日看實個老公就有用,因為佢覺得如果對方要變心,就算看唔看實都始終會繳,但至於點解靚靚以前偶然出現喺老公拍戲現場,佢話係因為自己好依賴Chilam,好鍾意同老公一齊:「好多人話成日都見到我兩個一齊,因為我哋兩個有陣時唔駛做嘢呢,就會去諗好多屬於我哋嘅生活。又例如有時我唔駛做嘢,張智霖會話:『我係邊度拍嘢呀!』咁我話,咦!嗰頭有牛肉麵喎!不如整個午餐!咁我就會去同佢食個飯,跟住先再去做我自己嘅嘢。」

    爛玩同緋聞都冇影響過張氏夫婦嘅婚姻,但反而係靚靚話生完魔童之後,因為佢有少少產後抑鬱,郁啲就發好大脾氣鬧人,就爭啲搞到兩公婆離婚咁滯!靚靚話:「我生完仔冇幾耐嘅時候,我諗係我嘅荷爾蒙出問題,有少少產後抑鬱,我會將佢講嘅說話放大啦!佢嘅行為放大啦!我睇到一啲我唔順眼嘅嘢!我會將佢放大啦!好恐怖,佢由初初忍忍忍,忍到佢都忍唔到㗎!佢都爆㗎!嗰個係幾危險嘅事嚟㗎!」

    靚靚話如果嗰陣時,冇補救呢就應該會離婚㗎喇!佢講:「我諗可能人就係咁怪㗎喇!一個人對你忍忍忍,你一路覺得佢係度無嘢,當佢一反抗嘅時候,你就會醒囉!我老公好少發脾氣㗎!嗰一次係佢忍唔到㗎!真係嘭門呀!我哋成家人都係晒度,佢嘭門,我諗佢嘭嗰一下呢係我醒㗎!因為我冇見過佢呢個行為!」

    袁詠儀曾經喺《金枝玉葉2》內,講過呢句對白:「你想我死先定你死先?」但原來現實生活中,張智霖都曾經問過靚靚類似嘅問題,問到當時靚靚點答?靚靚未開口已經眼泛淚光:「因為我都幾依賴佢,佢好多時會話:『喂!我死咗咁你點呀!』所以我同佢講,你唔好死住囉!」講完呢句,即刻眼濕濕!
    好多夫妻或伴侶接受訪問時都好怕另一半俾自己早死,寧願做先死嗰個,阿靚都係咁嘅心態,問佢係咪怕遲死要照顧老伴?佢話:「我唔係咁樣諗呀!而係…」佢聲音已有少少震,眼濕濕咁講:「即係我諗我…唔可以…呢一刻啦!我覺得我,如果佢唔係度… 我諗我生活唔到!老年失伴係好慘!」講度呢度已經哽咽!

    一向表現好獨立同性格堅強嘅靚靚,竟然話冇咗Chilam會生活唔到,點解會咁誇張?佢解釋話:「我唔係照顧唔到自己,但我諗係依賴,唔..唔知呀!我覺得冇咗佢 …我唔得㗎!」咁調番轉頭,Chilam冇咗靚靚又得唔得呢?靚靚話:「你問佢,佢實話得㗎!佢實話我都不知幾爽!但係我就唔敢諗佢走先呀!因為我成日覺得我希望係我走先囉!我唔希望係佢走先!我唔..唔…唔可以囉!」

    靚靚話依家淨係想每日好快樂咁樣過,其他嘅有任何煩嘢,佢都唔想去諗:「我好好滿足我依家嘅生活,一出門口就係好開心嘅一日。我只係想老公話俾我聽係點樣。點講呢!應該講,嗱!例如屋企啲車點樣去安排呀!司機呀!個仔呀!呢啲我好願意去做,但係你話例如人生應該點樣去,即係大事嘅嘢,我唔諗呀!我唔想去諗一啲煩惱,煩嘅嘢,好自私交晒俾佢去做,我覺得佢會處理得好過我。你睇佢起平時好似大細路咁,但有啲事我覺得佢處理得同埋分析得好過我囉!唔知呀!可能我有陣時祟拜佢!」

    最近Chilam先第一次用自己名買樓,因以前一路用公司名買,問靚靚老公有無送過樓俾佢?佢話:「咁佢都送過嘅!佢最近叫我睇㗎!我個人好怪㗎!我又冇一個一定要係咪你個名嗰個概念,因為我成日覺得張智霖呢個人,就算第日我哋真係好冇緣份,唔會係埋一齊都好,我覺得佢都會雙手奉上呢層樓俾我,就算係咪我個名,我覺得佢唔係一個無責任心嘅人,但係感情事好難講,無人知,無人可以講到,可能變嗰個係我呢!如果變嗰個係我,佢都俾層樓我,嘩!佢真係very good喇!真係諗得多咗下話!」

    (蘋果日報)

    SHARE