【至索人妻】岑麗香身材咁Fit 仲有呢樣秘技

    岑麗香日前以一襲水晶的重工透視高訂晚裝,現身TVB中華小姐選舉,驚艷全城,香香著呢條裙,真係肥少少都carry唔到,香香不嬲身材都fit爆,佢今日出席鐘錶活動時,接受訪問,有透露佢平時點樣修身:「飲多啲唔同嘅果汁,未必日日都飲到,但一有時間就會飲,至少每日一杯,唔同嘅雜果溝埋都得。」

    香香話平時飲果汁都係佢嘅私藏減肥方法之一。(IG圖片)

     

    網上流傳咗好耐,話香香有一條減肥秘方,就係食亞麻籽,香香回應呢個傳聞時話:「我都有食亞麻籽,間中放喺果汁或者其他食物上,不過就唔係完全靠呢個嚟減肥,而且唔係個個都啱食,巿面有好多唔同嘅健康食品,要試吓適唔適合自己,如果食完無效果就試其他。」而除咗注意飲食之外,香香話都會配合運動,而佢最常做嘅就係拉筋:「基本上得閒就做,拉多啲筋除咗會瘦之外,個人都會精神啲同埋企得直啲。」

    香香都幾經常食牛油果多士做早餐。(IG圖片)

    其實香香嘅減肥方式都有根據,日本減肥名醫佐藤萬成就最推崇拉筋減肥,佢認為,一味捱餓甚至斷食,令個肚同精神受折磨,但就忽略減肥嘅重點其實係燃燒脂肪,佐藤醫師根據過去的減重指導經驗,再利用科學數據,研發出一套「背部拉筋減肥法」,而佢自己都用個方法幫自己由加大碼減到中碼!拉筋可以增加肌肉量,令個人望落更加Firm,而且有助促進橫隔膜嘅活性,達至按摩內臟的效果,可以改善便秘的情況。

    除咗飲食,香香仲會配合埋拉筋。(IG圖片)

    而飲蔬果汁就有排便淨毒嘅效果,有豐富的維他命C、纖維及礦物質,可以促進腸胃蠕動,仲可以改善皮膚,一舉兩得。但注意唔好溝太多種生果,甜度太高的生果如車厘子同提子就盡量避免,盡量用熱量低的蔬菜如紅菜頭或西芹。每個人體質同習慣都唔同,參考其他人嘅減肥方法,學香香話齋,試過唔work唔使氣餒,慢慢搵到適合自己嘅減肥方式,各位姊妹,共勉之!

     

     

    (IG / HK01)

    SHARE